Делегейде сурагжаан деликатес - итали быштак дугайында тывызыксыг айтырыгга Тываныӊ садыг-үлетпүр палатазыныӊ президентизи Аяс Мөӊге тайылбырлап харыылаан.
«Көдээ ажыл-агый барааннарын бүдүрер «Туран» кооперативтиӊ даргазы Сергей Санчапович Сат «Ак-чем» фестивалынга боттарыныӊ барааннарын бараалгадып делгээн. Сүт, саржаг, творог, өреме дээш янзы-бүрү ак чем аймаан делгээни өөрүнчүг чорду.
Чаӊчыга бергенивис аъш-чем аймааныӊ аразындан моцарелла деп быштакты көрүп кааш, кайгап-харап, магадап көрүп турдум. Бистиӊ бүдүрүкчүлеривис, эр хейлер! Даштыкы барааннарны боттарыныӊ бүдүрген барааны-биле солуп турарын херек кырында көргүзүп турарлар.
Чай аразында чугаалаштывыс. Быштакты болдунар хемчээли-биле кылгаш, садып турар-даа болза, чон ону үргүлчү сураглап айтырып кээр. Ынчангаш бүдүрүлгениӊ хемчээлин улгаттырып болур.
Наадым байырлалы-биле бүдүрүкчүлерге байыр чедирип тур мен. Садыгдан аъш-чем садып ап тургаш, бистиӊ, тус черниӊ барааннарын шилип алырынче кыйгырып тур мен».
Р. Демчик
