Бо хүннерде – июнь 15-18 хүннеринде – Санкт-Петербург хоорайда чурттар аразының экономиктиг форуму болуп эртип турар. Тываның Баштыңы Владислав Ховалыгга баштаткан тыва делегация форумнуң ажылында киржип турар.
1997 чылдан тура ажылын эгелээн Форум 25 чыл дургузунда делегей чергелиг онза чугула болуушкун апарган – аңаа делегей чергелиг экономиктиг айтырыгларны сайгарып чугаалажыр, арга-дуржулга солчур ажыл хайныгып эртер. Чурттуң бүгү регионнарындан келген делегациялар улуг бүдүрүлге черлери болгаш организациялар-биле кады-ажылдажылга чорударын чедип алыр дээш Форумга киржип турар.
“Бис Россиядан Моол биле Кыдатче Тываның девискээрин дамчып эртер чаа делегей чергелиг демир-орук транспортунуң коридорун тургузар презентацияны белеткеп алдывыс – деп Тываның Баштыңы Владислав Ховалыг медеглээн. – Ук делгелгени Россияның Президентизиниң Сибирь федералдыг округта бүрүн эргелиг төлээзи А.Серышевтиң удуртканы “Сибирь дугуржулгазы” деп регионнар аразының ассоциациязының чөвүлелиниң хуралынга көргүзери планнаттынган. Оон аңгыда республиканың инвестиция төлевилелдерин боттандырар айтырыгларга хамаарышкан ужуражылгалар болуп эртер база кады-ажылдажылга дугайында дугуржулгаларга ат салыры көрдүнген. Бо бүгү ажылдың түңнелинде Тываның сайзыралы чаа чадаже бедип үнер деп идегеп турар мен”.
Тыва - Петербургтуң делегей чергелиг экономиктиг форумунда
16 июня 2022
20