Чурттуӊ шупту регионнарыныӊ төлептиг чедиишкиннериниӊ делгелгези 2023 чылдыӊ ноябрь 4-тен 2024 чылдыӊ апрель 12-ге чедир болур.
Республиканыӊ Баштыӊы Владислав Ховалыг Москва хоорайда ВДНХ делгелге комплекизинге барып четкеш, кезек аалчыларга Тываныӊ онзагай чедиишкиннерин таныштырган.
«Бистиӊ улуг чуртувуста субъект бүрүзүнүӊ катаптаттынмас чедиишкиннери болгаш онзагай чүүлдери бар. ВДНХ-да «Россия» деп делегей чергелиг делгелге-шуулганда ол бүгүнү бараалгадып көргүзүп турар. Бистиӊ Тывавысты алдаржыдып турар чүүлдерни: Азияныӊ географтыг төвү, Енисей хемниӊ эге бажы, скифтерниӊ онзагай алдын эдилелдери болгаш бистиӊ хөөмейивис дугайында Президентиниӊ Сибирь федералдыг округта бүрүн эргелиг төлээзи Анатолий Анатольевич Серышевке, губернатор коллегаларымга чугаалап берип турдум.
Тыва Республика келир үеже угланган чаа-чаа төлевилелдерни болгаш бот-идепкейжи саналдарны боттандырарынга кезээде ажык болбушаан, бүзүрелдии-биле бурунгаар көрүп чоруур.
Эргим, эш-өөр! «Россия» делгелгеже шуптуӊарны чалап тур мен. Ам эӊ кол хүнүвүске – Тыва Республиканыӊ хүнүнге белеткенип тур бис. Ол ноябрь 21-де болур. Силерни манап тур бис» — деп, регионнуӊ удуртукчузу В. Ховалыг аалчыларны делгелгеже чалап, социал блогунга бижээн.
/ Р. ДЕМЧИК белеткээн.
“Шын” №88 2023 чылдың ноябрь 18
