Тываның Баштыңы болгаш Чазааның кежигүннери шылгараңгай этнограф, аас чогаал, литература шинчилекчизи, Тыва Республиканың алдарлыг эртемдени Георгий Николаевич Курбатскийниң мөчээни-биле ооң өг-бүлезинге болгаш чоок улузунга кажыыдалды илереткен. Георгий Николаевич эртем-шинчилел болгаш чогаадыкчы ажылын тыва этнографияны шинчилээринге бараалгаткан.
Георгий Николаевич Курбатский 1936 чылдың ноябрь 9-та Куйбышев, амгы Самара хоорайга төрүттүнген. 1959 чылда Омскунуң педагогика институдун дооскан аныяк башкы Тывага ажылдап келген. Доозукчунуң чогаадыкчы болгаш эртем-шинчилел ажыл-чорудулгазы Кызылдың күрүнениң педагогика институдунга бөдүүн башкыдан эгелээш, литература кафедразының профессорунга чедир 40 чылдарның күш-ажылчы оруун эрткен. Г.Н. Курбатский филология бөлгүмүнге «Улустуң аас чогаалы», «Эрги орус литература» дээн ышкаш эртемнерге лекцияларны номчуп, практиктиг кичээлдерни эрттирип, а 1990 чылдарда төөгү факультединге Тываның этнографиязынга курсту башкылап турган.
1970 чылдарда Г.Н. Курбатский А.А. Жданов аттыг Ленинградтың күрүне университединиң аспирантуразынга шылгараңгай совет эртемденнер база дагдыныкчы башкылар Л.П. Потапов биле Р.Ф. Итстиң удуртулгазы-биле Тываның этнографиязынга кандидат диссертациязын тергиин кылдыр камгалаан. Филолог студентилери-биле улуг чыылдалыг болгаш чурт-шинчилел төөгүлүг ажылды сырый харылзаалыг чоруткан. Кызылдың педагогика институдунга Георгий Курбатскийниң тургусканы аас чогаал болгаш этнография бөлгүмү дыка хөй чылдарда ажылдап, тыва болгаш орус аас чогаалынга хандыкшылдыг студентилерни болгаш башкыларны каттыштырган.
Георгий Николаевич Курбатский 70 ажыг эртем статьяларының, 4 монографияның, «Тывалар боттарының аас чогаалында», «Эрги орус литератураның изи-биле», «Д.И. Фонвизинниң чогаалдары XVIII чүс чылдың орус литературазында» дээш оон-даа өске эртем-нептерелдиг үндүрүлгелерниң автору.
Георгий Николаевич Курбатский Тыва Республиканың Чазааның Даргазының Хүндүлел бижии, Россия Федерациязының Өөредилге болгаш эртем яамызының Хүндүлел бижии база Россия Федерациязының Эртем болгаш дээди өөредилге яамызының «Өөредилгениң хөгжүлдезинге үлүг-хуузу» деп медалы-биле шаңнаткан. Ол ышкаш «Тываның күрүне университединиң алдарлыг профессору», «Тыва Республиканың эртеминиң алдарлыг ажылдакчызы» хүндүлүг аттарның эдилекчизи.