II-ги Тудуг шуулганын регионга тудуг ажылын хөгжүдүп сайзырадыр сорулга-биле эрттирер.
Тывага архитектура-тудуг политиказын, ол ышкаш бажыӊ-балгат тудугларынга акшаландырыышкын болгаш инвестиция киирер төлевилелдерни экижидер талазы-биле саналдарны даӊзылап бижээн. Шуулганныӊ ажыл-агыйжы кезээниӊ соонда, республиканыӊ кол стратегтиг дугуржулга-керээлеринге ат салыр.
Тудуг шуулганы Кызылга сентябрь 30-де Чазак бажыӊынга болгаш Аныяктар өргээзиниӊ залдарынга болур. Оффлайн, онлайн хевирге эртер шуулганны дорт дамчыдылгага көрүп болур арга тургустунган. Шуулганга чүс хире специалистер киржир. 30 хире спикерлерни чалаан.
Шуулганныӊ аалчылары Национал музейге, «Азия төвүнге», Тыва үндезин культура төвүнге экскурсиялаар, регионда чурттап турар чоннарныӊ культуразы, төөгүзү-биле таныжып, концерт номерлерин көөр.
Эрткен чылын баштайгы тудуг шуулганы октябрь айда болуп эрткен. Аӊаа республиканыӊ эрге-чагырга төлээлери, Москва, Красноярск, Абакан, Иркутск, Самара, Санкт-Петербург хоорайлардан барык 30 хире эксперттер киришкеш, Тываныӊ тудуг адырыныӊ ажыл-агыйын сайгарып чугаалажып турган.