Саха (Якутия) Республиканың Чазааның дилээ-биле Тываның арга-арыг камгалаар авиабаазазының 40 парашютчу десантниктерин чорупканын Тываның Баштыңы Владислав Ховалыг дыңнаткан. Федералдыг курлавырга хамааржыр Тываның өртчүлер бөлүү ооң мурнунда Магадан облазының арга-арыг өрттерин узуткаарынга киришкен. Якутияда 1460 муң гектар девискээрде болуп турар 90 ажыг арга-арыг өрттерин өжүреринге бүгү-ле күштү болгаш чепсек-херекселди мөөңнээн.
Өрт айыылы улгатканда, бот-боттарынга дузалажыры-биле аңгы-аңгы регионнардан өртчүлерни Якутияже чорудуп турарын Владислав Ховалыг демдеглээн. Ооң сорулгазы – арга-арыг өрттерин чавырылдырып өжүрери, чурттакчылыг черден айыылды чайладыры болгаш чок кылыры. Эрткен чылын Тывага арга-арыг өрттери-биле демисежиринге Красноярск крайдан, Уралдан өртчүлер дузалашкан.
Улуг өрттер кат чыыр үеде хып үнерин, ооң кол чылдагааны кижиниң от-биле оваарымча чогу деп, Тываның Баштыңы демдеглээн. Ол чаңгыс чер чурттугларын өрттү болдурбазының чурумун сагыырынче база арга-арыгга хумагалыг болурунче кыйгырган.
Баш бурунгаар медээлерден алырга, Тывадан парашютчу десантниктер Якутияның Олемкинский районунче баар. Ында бо хүнде 17 өрт хып турар.
Регионалдыг диспетчер албанының медээзи-биле, республиканың арга-арыгларында 9 га шөлде 3 өрт хып турар: Кызыл кожууннуң Чербиде, Эрзин кожууннуң девискээринде база Каа-Хем кожууннуң Сизимде арга-арыгларда. Өрттерни өжүреринге өрт албанының 33 парашютчу десантниктерни киириштирип, 4 техниканы ажыглап турар.
Өрт айыылының сезонунуң эгезинден тура республикага 81 өрт бүрүткеттинген.
Бистиң корр.
Чурукту интенеттен алган.
"Шын" №57, 2023 чылдың август 2