В. Көк-оол аттыг Национал театрга 2023 чылда Чоннуң чаңгыс деминиң чылын түңнээн байырлыг хемчег болуп эрткен. Байырлалдың хүндүлүг аалчызы Владислав Ховалыг ниити херекке үлүүн киирген бүгү чонга четтиргенин илереткен. Чонунга бараан болуп, төрээн чуртунга ынакшылын көргүзүп, бедик хей-аъды-биле хөйнү каттыштырып эвилелдээн республиканың идепкейлиг чурттакчыларынга өөрүп четтириишкиннерни болгаш күрүне шаңналдарын тывыскан.
Республиканың хөгжүлдезинге быжыг дөс апарган идепкейжи хамааты туруштуг болгаш тоомча чок эвес чурттакчылар, сайгарлыкчылар, хөй-ниитижилер, волонтерлар Чоннуң чаңгыс деминиң чылын түңнээр дээш, чер-черлерден чыглып келген.
2023 чылда, Тывада Чоннуң чаңгыс деминиң чылында, аңгы-аңгы деңнелдиг болгаш угланыышкыннарлыг чүс-чүс хемчеглер – культура-массалыг болгаш спортчу, национал, шажынчы болгаш күш-ажылчы хемчеглер, мөөрейлер, улуг фестивальдар, акциялар, конференциялар, адырлар шуулганнары база өске-даа чүүлдер болуп эрткен. Хемчээли болгаш деңнели аңгы-даа болза, бо бүгү хемчеглер чаңгыс сорулгалыг – бот-боттарын деткижип, дузалажыры, чоок улузунче холун сунуп, өрү тырттыжары.
Тывага эрткен Чоннуң чаңгыс деминиң чылы үениң чаа кыжаныглары-биле демиселде ниитилелдиң чаңгыс деминиң кайгамчык үлегер-чижээн көргүскенин Тываның Баштыңы онзалап демдеглээн. Тываның чурттакчылары тускай шериг операциязының киржикчилеринге болгаш оларның өг-бүлелеринге дуза кадарынга онза демниин көргүскен.
Фронтуга чуртта эң хөй автоколоннаны – 40 ажыг автомобильди Тыва берген. Республиканың чурттакчылары ТШО зоназынче автомобильдер болгаш херек өске-даа техника аймаан чорудуп бербишаан. Чаңгыс чер чурттуг дайынчыларывыска ээлчеглиг дузаламчыны Шагаа бүдүүзүнде чедирип бээри-биле, бо хүннерде республиканың шупту кожууннарында чыылда чоруп турар.
– Амыдыралывыстың аңгы-аңгы адырларынга бир демниивисти көргүстүвүс. Чижектер муң-муң. Оларның шуптузун санаары болдунмас. Ындыг болзажок ниити херекке боттарының үлүүн киириштирген бүгү чонумга өөрүп четтириишкинниң сөстерин сеткилимниң ханызындан илередип көрейн – деп, Владислав Ховалыг чугаалаан.
Тываның Баштыңы Чоннуң чаңгыс деминиң чылының хемчеглеринге идепкейин көргүскен киржикчилерге өөрүп четтириишкиннерни чарлап, күрүне шаңналдарын диңмиттиг адыш часкаашкынының үделгези-биле тывыскан.
Тускай шериг операциязының киржикчилерин деткип, «Автопоезд» бүгү-российжи улусчу фронтунуң акциязынга идепкейлиг киржилгези дээш Тыва Республикада азербайджан диаспораның төлээзи, «Бенконс» кызыгаарлыг харыысалгалыг ниитилелдиң директору Заман Латиф оглы Гаджиевке база Тыва Республикада «Улусчу фронт. Улусчу полктар» төлевилелдиң регионалдыг координатору Александра Васильевна Шагировага Тыва Республиканың Баштыңының өөрүп четтириишкин бижиктерин тывыскан.
Тыва Республикада Чоннуң чаңгыс деминиң чылында боттандырган төлевилелдерге идепкейлиг киржилгези болгаш профессионал уран чүүлдү хөгжүдеринге үлүг-хуузу дээш В.М. Халилов аттыг Тываның күрүне филармониязының ыраажы артистери Елена Александровна Кууларга база Цэцэндэлгэр Тэгшээге Тыва Республиканың Баштыңының өөрүп четтириишкин бижиктерин тывыскан.
Тускай шериг операциязының киржикчилеринге дуза көргүзер дээн ачы-буян акцияларынга киржилгези болгаш хамааты быжыг туружу дээш, Бии-Хем кожууннуң «Буянныг орук» ачы-буян фондузунуң директору Наталья Анай-ооловна Ондарга Тыва Республиканың Баштыңының өөрүп четтириишкин бижиин тывыскан.
Тыва улусчу уран чүүлдүң хөгжүлдезинге база ону кадагалап арттырарынга үлүг-хуузу болгаш хөй чылдарда ак сеткилдиг ажылы дээш Тыва Республиканың Культура яамызының өнчү-хөреңги талазы-биле ажыл-агый эргелелиниң улусчу ус-тывыш уран чүүлүнүң специализи Сайдаш Николаевич Самданга Тыва Республиканың Баштыңының өөрүп четтириишкин бижиин тывыскан.
«Тубтен Шедруб Линг» сарыг шажын хүрээ тудуушкунунга болгаш ажыдыышкынынга үлүг-хуузу болгаш буддийжи чаңчылдарны камгалап-кадагалаарынга тургузукчу ажылы дээш Тываның регионалдыг хөй-ниитижи аныяктар шимчээшкининиң волонтеру Пенде Мөңгүн-оолович Шойдунга Тыва Республиканың Баштыңының өөрүп четтириишкин бижиин тывыскан.
Идепкейжи хөй-ниитижи болгаш тургузукчу ажыл-чорудулгазы, тускай шериг операциязының киржикчилерин деткииринге база ачы-буян дузазын көргүзеринге үлүг-хуузу дээш Таңды кожуунда «Чуделькинниң школазы» регионнар аразының хөй-ниити шимчээшкининиң координатору Евгения Сергеевна Бабкинаны Тыва Республиканың Баштыңының Хүндүлел бижии-биле шаңнаан.
Культура болгаш уран чүүл адырында көскү чедиишкиннери, тыва улустуң үндезин хөгжүмүн камгалап арттырарынга үлүг-хуузу дээш «Ят-Ха» бөлүүнүң лидери, композитор, артист Альберт Будачиевич Кувезинни «Шылгараңгай күш-ажылы дээш» Тыва Республиканың медалы-биле шаңнаан.
Тыва Республиканың социал-экономиктиг хөгжүлдезинге үлүг-хуузу, аныяктарның шериг-патриотчу кижизидилгезиниң талазы-биле идепкейжи хөй-ниитижи ажылы, тускай шериг операциязының киржикчилерин деткээни дээш Тыва Республиканың Дээди Хуралының (парламентизиниң) айыыл чок чорук, корум-чурум болгаш кызыгаар айтырыгларының талазы-биле комитет даргазы Эрес Михайлович Хууракты «Шылгараңгай күш-ажылы дээш» Тыва Республиканың медалы-биле шаңнаан.
ТР-ниң Чазааның парлалга албаны.
«Шын» №6 2024 чылдың январь 27
