Тыва Республикада ИХЯ-ның дежурный кезээнге 2023 чылдың декабрь 8-те Кызылдың 17 дугаар школазында частыр херексел салган деп медээ келген.
Тыва Республиканың ИХЯ, Федералдыг айыыл чок албанның болгаш Росгвардияның ТР-де эргелели дүрген хемчег ап, школаны хынаанының түңнелинде, частыр херексел тывылбаан.
Полиция ажылдакчыларның оперативтиг-дилээшкинниг хемчеглер үезинде муниципалдыг бюджеттиг өөредилге албан чери - Кызыл хоорайның № 17 ортумак школазының 9-ку клазының ийи өөреникчизи туттурган болгаш терроризм актызының дугайында билдингир меге медээ дамчытканы илерээн.
Ол факт дээш РФ-тиң КХ-ниң 207 чүүлүнүң 2-ги кезээ-биле (социал инфра-тургузуглуг объектилерге хамаарыштыр терроризм актыларының дугайында билдингир меге медээ дамчытканы дээш) кеземче херээн оттурган. Ук үүлгеткен херек дээш эң үстүкү хемчээли 5 чылга чедир хосталгазын казып шиидери көрдүнген болур.
Ук херекке онаашкан элээди оолдар 14 хар четкенин барымдаалааш, кеземче херээниң хоойлузу-биле херекти онаар.
Тыва Республикада ИХЯ ада-иелерге, улуг улуска кыйгырыгны салып турар.
Үе-шаанда ажы-төл-биле чугаалажыышкыны чорудары – оларны хоойлудан дашкаар чорук кылырындан баш удур камгалаар. Практикадан алгаш көөрге, кем-херек үүлгедип турар элээдилер колдуунда өг-бүлезиниң кичээнгей чогундан азы бодун кеземче херээнге онаашпайн баар мен деп санап турарындан үүлгедип турар болур.
Кем-херек үүлгедиглеринден баш удур чайладыры-биле хоойлудан дашкаар үүлгедиглерниң багай талаларын ажы-төлге тайылбырлап, кижидилге ажылын чорудары чугула. Уругларның культура деңнели бедик болган тудум, хоойлудан дашкаар үүлгедиг кылыры, кем-херекке онаажыры эвээш болур.
Тыва Республикада ИХЯ-ның парлалга албаны