Тывада тус черниң төлээлекчилер хуралдарынче немелде соңгулдалар эгелээн. Тываның Соңгулда комиссиязының дыңнатканы болза, 15 муниципалдыг тургузугларда Төлээлекчи хуралдар депутаттарынче немелде соңгулдаларны эрттиреринге 37 соңгулда кампаниязы болуп эртер. Кызыл хоорайга, Бай-Тайга, Барыын-Хемчик, Чөөн-Хемчик, Каа-Хем, Кызыл, Өвүр, Сүт-Хөл, Таңды, Тес-Хем, Тожу, Улуг-Хем, Чаа-Хөл, Чеди-Хөл база Эрзин кожууннарга соңгулдалар болур.
Бадылаашкын үезинде Кызыл хоорайдан 4 депутат, муниципалдыг районнардан 15 депутат база хоорай болгаш сумулардан 35 депутат – шупту 54 депутатты соңгуур.
Бо чылын сентябрь 14-те, чаңгыс аай бадылаашкын хүнүнде, 8.00 шактан 20:00 шакка чедир чер-черлерге соңгулдалар болуп эртер. Тываның 31 муң ажыг соңгукчулары азы республика девискээринде шупту соңгукчуларының 15 хуузу соңгулдаларга үнүн бээр ужурлуг.
Соңгулдаларны эрттирер дугайында шиитпирни албан ёзузу-биле парлаан соонда, 81 кандидат бүрүткеткенин Тыва Республиканың Соңгулда комиссиязы дыңнаткан. Политиктиг партияларның регионалдыг салбырлары 80 кордакчыны идип үндүрген: «Чаңгыс демниг Россия» – 54, ЛДПР – 24, КПРФ – 2. Оон аңгыда бир кордакчы бодун идип үндүрген кылдыр бүрүткеткен. Федералдыг хоойлужудулганың негелделерин сагывааны дээш, 6 кандидатты бүрүткээринден ойталаан.
Бистиң корр.
Чурукту ТР-ниң Чазааның парлалга албанындан хоолгалаан.
“Шын” №31 2025 чылдың август 14