Красноярск хоорайга сентябрь 6–8 хүннеринде Олимпий оюннарының 3 дакпыр тиилекчизи Бувайсар Сайтиевтиң шаңналы дээш XIX дугаар делегей чергелиг хостуг хүреш маргылдаазы болган. Аңаа 18 харга чедир оолдар аразынга өске чурттардан 9 база Россияның 25 регионундан ниитизи-биле 282 аныяк мөге хүрешкен. Бистиң республикадан хөй тренерлерниң удуртулгазы-биле 30 оол киришкен.
Олимпийжи курлавырлар спорт школазының тренер башкызы Даваа Ондар маргылдаа дугайында тайылбырны берген: “Ниитизи-биле оолдар ортумак хүрешкен. Өөреникчим Чимит-Доржу Бады 80 килдиг мөгелер аразынга эки хүрешкеш, шаңналдыг 3-кү черже киргенин чедиишкин деп санаар-дыр мен. Чедер-четпестеривисти эдип, ам-даа эки өөренир бис.
Кызыл кожуундан тренер башкы Күзел Иргиттиң өөреникчилери Сайын Саая биле Темир Саая 48 база 51 килдиглер аразынга 3-кү шаңналдыг черни алганы улуг чоргаарал. База ол ышкаш дараазында: 45 килге бистиң оолдар Маадыр Күжүгет биле Ай-Хаан Шыырап 2–3 дугаар шаңналдыг черлерни ап, килинге шыырактарның санынче киргеннер”.
Республиканың алдарлыг тренери, спортчу хүрештер чөвүлелиниң даргазының оралакчызы Айдаш Самдан: “Ниитизи-биле бо турнир чылдан чылче күштелип турар. Узбекистан, Казахстан, Кыргыстан, Иранның мөгелери Россияның мөгелерин ажып, шыырак апарып турар. Кол айтырыг — Россияның мөгелери шыырак маргылдааларда эвээш киржип турары хомуданчыг-дыр. А бистиң республикада база ындыг, харын оон-даа чавыс деңнелде. Бо талазы-биле биске белеткел өөредиглериниң хевирлерин (методиканы) чаартып, ооң иштинде сагыш-бодал хөөннерин, арга-дуржулга, быжыг күш-шыдал база шииткекчилер өөредиглерин чаартып күштелдирери чугула.
Чижээлээрге, Начын Куулар ышкаш туруп алгаш, тыва хүрештиң күдүктээр, илбектээр, хояр база грек-рим хүрештиң бурунгаар, аткаар, агаарга көдүрүп алгаш, октаар чараш арга-хоргаларын өөредир үе келген”.
Тренер келир чылын январь айда спортчу хүрештер чөвүлелиниң отчет соңгулдалыг шуулганы болурун дыңнатты.
А.ЧАМБАЛ-ООЛ.
“Шын” №70 2024 чылдың сентябрь 14
