Россия Федерациязының Федералдыг Хуралының Федерация Чөвүлелинге «Маадыр уруглар» деп бүгү-российжи хамааты-патриотчу төлевилелдиң киржикчилеринге шаңналдар тыпсыр езулал эрткен. Онза байдалдарда кижилерниң амы-тынын камгалаарынга эрес-дидим чорукту көргүскен элээди ургуларга шаңналдарны тывыскан. Кызылдың 3 дугаар школазының чедиги клазының өөреникчизи, 15 харлыг Тимофей Титов шаңнал алганнарның аразынче киргенин Тываның Баштыңы Владислав Ховалыг дыңнаткан. Чоннуң чаңгыс деминиң хүнүнге тураскаадып XII дугаар шаңнал тыпсыр езулалды эрттирген.
Бо чылдың март айда Тимофей дарый шиитпир негеттинер онза байдалга таварышкан. Хоорай автобузунга чорда, эзирик эр кижи олурупкаш, дерзииленип эгелээн. Автобус иштинге ол эр кижиден ангыда, чаштар, херээжен улус олурган. Тимофей хөделген кижиниң холунда чидиг чепсекти көрүп кааш, пассажирлерни камгалаар хемчегни дораан алган. Ооң дидим базымы база байдалды дүрген шинчилептери чөрүлдээни чавырлдырып, айыыл-халапты чайлаткан.
Элээди оол бодунуң чурумун маадырлыг чорук кылдыр санаваан-даа, ону кымга-даа чугаалаваан. Бо болуушкун дугайында медээ автобуска чораан херечиниң ачызында чонга тарай берген. Маадырны социал четкилерден дилеп эгелээн.
Владислав Ховалыг Тимофей Титовтуң маадырлыг чоруу – эрес-дидим чорук назы-хардан хамаарышпас дээрзиниң көскү чижээ-дир деп демдеглээн.
Бүгү Россиядан 19 оолдар-уруглары парламентиниң үстүкү палатазының иштинде Федерация Чөвүлелиниң шынзылгаларын болгаш «Эрес-дидим чорук дээш» медальдарны алганнар. Шаңналдарны Россияның Маадырлары Юрий Воробьев, Сергей Петров, Амыр Аргамаков, Дмитрий Перминов, Виктор Бондарев, Александр Карелин, Юрий Нимченко база Совет Эвилелиниң Маадыры Игорь Запорожан шаңналдарын тывыскан.
ТР-ниң Чазааның парлалга албаны.