Маадырлыг чоруу-биле күрүнениң болгаш чонунуң мурнунга бараан болганы дээш тыпсыр бедик шаңнал – «Россияның Маадыры» деп күрүне адынче Тывадан база бир дайынчыны киирген. Республиканың Баштыңы Владислав Ховалыг бодунуң телеграм-каналынга ооң дугайында дыңнаткан.
Солдаттың шериг албанын эрттирип турары «Восток» бөлүктүң командылал чери Тыва Республикадан дайынчы Найырны (шолазы «Кыргыз») шаңналче киирген. Владислав Ховалыг шериг удуртулгазынга оларның саналы дээш сеткилинден өөрүп четтиргенин илереткен. «Фронтунуң аңгы-аңгы угланыышкыннарында база янзы-бүрү шериг кезектеринде дыка хөй бистиң дайынчы оолдарывыс маадырлыг чоруктарны кылып турарын билир мен. А оларның бирээзин бедик шаңналче кииргени дээрге тайбың дээш амы-тынын харамнанмайн тулчуп чоруур кижилерге бүгү чурттуң өөрүп четтириишкининиң ыдык демдээ-дир» - деп, регионнуң удуртукчузу демдеглээн.
Шериг корреспондент Александр Рогаткин «Россия 1» телеканалдың «Неделяның медээлери» дамчыдылгазынга тыва оолдуң дайынчы даалгазын маадырлыг күүсеткениниң дугайында репортажты көргүскен. Ол болуушкуннар Запорожьениң ийиги улуг хоорайы Гуляйполеже шавар халдаашкын үезинде болган.
Тыва дайынчы Найыр хоорайже бир дугаар халдап киргеш, бодунуң эштеринден хоорлу берген. Командылал чериниң дужаалы езугаар камгалал турушту ээлеп алгаш, элээн каш дайзыннарны чок кылган. «Аттырып алган будунда балыын боду шарааш, бүзээлелди үш хонук дургузунда тудуп келген. Чүү-даа болур болза, дириг артар-дыр дээн шиитпир-биле чанында бажыңче халып ора, база катап дайзын-биле дорт уткужа берген... Балыглангаш, шагзырап-шылаан Найыр дедир аткаарлаар дугайында дужаалды алган соонда, 14 километр черни, дүжүп бербейн ээп келген!» - деп, Владислав Ховалыг дайынчының маадырлыг чоруун сактып чугаалаан.
Найыр Кыргыс – Бай-Тайга кожууннуң Х.А. Анчымаа-Тока аттыг Кызыл-Даг школазының доозукчузу. Тус чер чагыргазының дыңнатканы-биле алырга, ол чаа-ла 20 харлыг. «Ада-иези хеймер оглунга эки кижизидилгени берген. Найыр школага класс даргазы, эвилең-ээлдек, дузааргак, хөккейге алды дакпыр чемпион турган» - деп, бай-тайгажылар чугаалаан.
Тускай шериг операциязы эгелээнден бээр «Алдын Сылдыс»-биле шаңнаткан Тыва Республикадан дөрт дугаар кижи Найыр апаар дээрзин демдеглээлиңер. Бо хүнде Россияның Маадыры деп атты Мерген Донгак, Буян Куулар, Чалым Чүлдүм-оол олар эдилеп чоруур.
ТР-ниң Чазааның парлалга албаны.