2025 чылдың декабрь 16-дан эгелеп Күрүне ачы-дуза порталынга тускай шериг операциязының киржикчилеринге чаа ачы-дуза ажылдап эгелээн. Бо сервис эрге-байдалын таныштырарынга электроннуг бадыткалды бөдүүнчүткен арга-биле бээр.
Тыва Республиканың Чазаа биле Россияның Чурагайлыг хөгжүлде, харылзаа болгаш массалыг информация чепсектериниң яамызы ол ачы-дузаны кады ажылдап кылган. ТШО киржикчизи бүрүткел соонда тускай QR-кодту алыр. Ол код культурлуг болгаш спортчу хемчеглерже чиигелделиг кирерин чөпшээрээр.
Регионнуң Культура яамызының, Чурагайлыг хөгжүлде, харылзаа болгаш массалыг информация чепсектериниң яамызының база «Ада-чурт камгалакчылары» күрүне фондузунуң төлээлери киришкен ажылчын хуралга Тываның культура сайыды Виктор Чигжит билеттер бээриниң чурумун бөдүүнчүдүп, маадырларны ам-даа деткиири чугула дээрзин демдеглеп, күрүне фондузу база иелер комитеттери-биле кады ажылдаарынче коллегаларын кыйгырган.
Күрүне фондузунуң социал координатору Оюма Банчык театрлар болгаш күрүнениң культура албан черлеринде концерттерни халас көөр эргелиг ТШО киржикчилериниң өг-бүлелеринге культурлуг хемчеглерже чиигелделиг кирери онза хереглелде деп демдеглээн.
Тываның культура албан черлери ТШО эгелээнден бээр тускай операция киржикчилерин болгаш оларның өг-бүлелерин идепкейлиг деткип турарын сагындыраал. Дараазында ачы-дузалар кол болуп арткан:
• Национал музейниң болгаш ооң салбырларының доктаамал болгаш түр үениң делгелгелерин халас көөр эрге;
• республикада концерттер, шиилер болгаш өске-даа культурлуг хемчеглерже халас билеттерни бээри.
Чаа чурагай сервизи ТШО киржикчилеринге чиигелделер алырын эптиг кылдыр кылган.
ТР-ниң Чазааның парлалга албаны.