Тывага беш чаа уруглар сады ажыттынар

Тывада «Демография» национал төлевилел күүселдези-биле туткан назы четпээн уругларга чаа беш уруглар садын ажыдарынга белеткенип турар.
Республикада үш болгаш оон хөй ажы-төлдүг өг-бүлелер хөй болганындан, российжи субъектилерниң аразындан уруглар садынга хереглел улуг. Регионнуң Баштыңы Владислав Ховалыг школа назыны четпээн өөредилге албан черлериниң чедингирин хандырары тус чер чазааның мурнады боттандырар ажылдарының бирээзи деп демдеглээн.

«Демография» национал төлевилел-биле Каа-Хем кожууннуң Эржей суурга, Ак-Довурак база Чадаана хоорайларга, Тере-Хөл кожууннуң Кунгуртуг база Кызыл кожууннуң Каа-Хем суурларга 360 уруглар хүлээп алыр беш уруглар садын тудуп эгелээн. Төлевилелде чүгле тудуг тудары эвес, а амгы стандарттарга дүүштүр эт-сеп-биле чүмнеп, уруглар ойнаар шөлдерни чаагайжыдары көрдүнген.

Владислав Ховалыг бо чылын ол өөредилге объектилериниң тудуун үе-шаанда доозар дээш, немелде акшаландырыышкынны хаара тудуп, федералдыг бюджеттен 304 млн рубльди алган.

Уруглар садтарын ажыдары-биле амгы үеде кадрларны четчелээр, эт-севин салыр, садикке кээр бир хар чартыктан үш харга чедир уругларның даңзызын тургузуп турар.