Дүүн, октябрь 30-де, Кызылда «Чаныш-сыныш чок арат» тураскаалының чанынга Политиктиг репрессияга когарааннар хүнүнге тураскааткан митингиге репрессияга таварышканнарның төрелдери, хөй-ниити ажылдакчылары, аңгы-аңгы организацияларның төлээлери киришкен.
Тыва Республиканың Чазак Даргазының оралакчызының албан-хүлээлгезин күүседип турар Айдыс Сынаа чыылганнарга сөстү чугаалаан. Ол бодунуң кыйгырыында чүгле чүректерге эргим аттарны эвес, а каржы-дошкун истеп-сүрүүшкүннүң уржуундан өлүрткен, шөлүттүрген муң-муң билдингир болгаш ам-даа билдинмес болуп арткан кижилерни сактып чорууру — кижи бүрүзүнүң хүлээлгези деп демдеглээн.
Тыва Арат Республиканың девискээринге массалыг репрессия үезинде 138 кижини өлүрүп шииткен. Репрессияга бир дугаарында таварышканнарның аразында Тываның улусчу-революсчу намының Төп комитединиң чиңгине секретары база Тыва чазактың бирги даргазы Монгуш Буян-Бадыргы бар, ону 1929 чылда хоругдааш, 1932 чылда шииткелин күүсеткен. Ол ышкаш Биче Хуралдың бир палатазының даргазы Адыг-Түлүш Хемчик-оолду, Тыва банкының даргазы Танчай Оюнну база ТАР-ның бирги прокурору Кара-Сал Пиринлейни адып шииткенин оралакчы дарга сагындырган. Репрессияга таварышкан арткан кижилерниң хөөржүткен черин сактыр кижи безин артпаан. Когарааннарның аразында репрессия хемчеглериниң түңнелинде ада-иезиниң хайгааралы чок арткан уруглар база бар.
Тывада политиктиг репрессияга таварышкаш агарткан 55 кижи ай санының акша төлевирлерин ап турар, оларның 11-и политиктиг репрессияга таварышкан статустуг база политиктиг репрессиядан агарткан база когараан деп санаан 8 өг-бүле кежигүннери бар.
Регионнуң Күш-ажыл болгаш социал политика яамызы политиктиг репрессияга таварышкан Тываның чурттакчыларының, ол ышкаш өг-бүле кежигүннериниң эрге-байдалын тургузары-биле политиктиг репрессия төөгүзүнүң музейи-биле кады ажылдажылганы дыка хөй чылдар дургузунда чорудуп турар.