Сентябрь 2-де Тывага РФ-тиң Президентизиниң келгениниң түңнелдери-биле даалгалар даңзызын Кремльде белеткеп турар. Республиканың Баштыңы Владислав Ховалыгның республика Чазааның хуралынга дыңнаткан медээзинден алырга, бо хонуктарда документиниң төнчү редакциязын ажылдап доозуптарга, Владимир Путинче бадыладыры-биле киирер, ооң соонда ажыл-чорудулгаже кирер.
Президентиниң адынче болгаш эрге-чагырганың федералдыг органнарының адрезинче киирген ооң дилээниң кол кезээн улуг инвестициялар негеттинип турар республиканың социал-экономиктиг хөгжүлдезиниң онза чугула сорулгалыг айтырыглар ээлээнин Тываның Баштыңы дыңнаткан. Ниитизи-биле 10 ажыг айтырыглар бар, ооң иштинде чуртталга бажыңнарының тудуу, Абакан – Абаза база «Енисей» Р-257 автооруктарның септелгези, мелиорация системаларын катап тургузары.
Владислав Ховалыг вице-премьерлер база федералдыг Чазактың сайыттарынга ужурашканының соонда, даалгалар аайы-биле кураторларны база харыысалгалыг күүседикчилерни быжыглаанын чугаалаан. Президент Администрациязының удуртукчузунуң оралакчызы Максим Орешкинниң удуртканы ажылчын бөлүк бо чоокку үеде даңзылар аайы-биле ажылдааш, күрүне Баштыңынга ат салдырар кылдыр дамчыдар. «Чоокку чылдарда бистиң кол программалыг документивис херек кырында ол апаар» — деп, республиканың Баштыңы Президент даалгаларының ужур-утказын тайылбырлаан.
Бистиң корр.
«Шын» №72 2024 чылдың сентябрь 21
