Чугажак хар бысканнап каан хоорайның
Чурумалы Тывам ышкаш эвес-ле-дир.
Чуңма, телер харап турар кадыр даглыг
Чуртум сактып, сарынналыр мындыг-ла мен.
Шимээн-даажы дүн-хүн дивес үзүктел чок,
Шиилээн эзим ырызынга эннешпес-тир.
Төнчү ужу көзүлбес хөй кудумчулар
Төрээн черим хову-шөлүн чоктадыр-дыр.
Нева хемниң чайынналган чалгыглары
Чечен сөстер шүлүктерге немевес-тир.
Херии Хемчиим сайда саарыы – кулактарда,
Хевистелчек шиник шыгы – карактарда.
Делгем чуртта, Россияда болганымга
Дендии кайыын хомудаксап чоруур деп мен.
Судалымда кады чоруур Тывам сактып,
Суглуг караам чажын бүдүү чодар-дыр мен.
/ Дарый Ооржак.
Санкт-Петербург.
“Шын” № 98 2024 чылдың декабрь 21