Тывада Владимир Путинниң эгелекчи саналы-биле “Чурагайлыг экономика” национал төлевилелдиң боттанылгазы уламчылап турар. Ук төлевилел-биле республиканың Качык, Ырбан, Хүт, Ийме деп биче суурларынга дүрген ажылдаар интернетти кошкан.
Төлевилелди сөөлүнде ыраккы Тере-Хөл кожуунга боттандырып, Тал суурну чурагайжыткан. Аңаа харылзааны декабрь 15-те салган. Ынчалза-даа суурнуң электри хандырылгазы күштүг сооктарда угбас болган.
Тываның Баштыңы Владислав Ховалыгның даалгазы-биле ТР-ниң Чурагайлыг хөгжүлде, Одалга болгаш энергетика яамыларының специалистери дизельди дүн-хүн дивес ажылдаар кылдыр тургузар ажылдарны организастаар айтырыгны шиитпирлеп турар.
Төлевилелдиң боттанылгазы бо чылын база уламчылаар. Кызыл хоорайның Вавилин ээтпээнге, СНТ 12-ге, Бай-Хаак, Кызыл-Арыг, Ак-Даш, Кызыл-Тайга суурларга харылзаа чагыларын тургузар ажылдар чоруп турар.
Ол ышкаш харылзаа кожар черлер даңзызынче эң-не нептереңгей турисчи маршруттар “Алдын-Булак” этнокультурлуг комплекс болгаш Дус-Хөл база кирген.
Бистиң корр.
«Шын» №1 2024 чылдың январь 10
