Ноябрь 30-де, Авалар хүнүнде, Тываның В. Көк-оол аттыг национал хөгжүм-шии театрынга республика чергелиг «Кадын-2025» мөөрейниң түңнел чадазы болуп эрткен.
Россияда чарлаттынган Ада-чурт камгалакчызының чылынга болгаш Ада-чурттуң Улуг дайынынга Тиилелгениң 80 чылынга тураскааткан бо мөөрейге 35-тен 45 харга чедир авалар эгезинде кожуун чергелиг мөөрейлешкен.
Оон шилиттинген 20 кадын мөөрейниң түңнел чадазынга киришкеш, тус-тузунда шаңналдарны алган:
«Ай-Хүн херелдиг Алдын кадын» – Гульсара Шыырапай (Улуг-Хем) — 200 муң рубль; «Ай-Хүн херелдиг Мөңгүн кадын» – Марина Конгар (Таңды ) — 150 муң рубль; «Ай-Хүн херелдиг Хүлер кадын» – Алдын-Ай Куулар (Каа-Хем) — 100 муң рубль.
Дараазында номинация аайы-биле тиилекчи бүрүзү 30 муң рубль-биле тус-тузунда шаңнаткан: «Тергиин социал биидең (ролик)» – Радомира Хомушку (Кызыл кожуун); «Чойган сынныг кадын» – Анаймаа Монгуш (Ак-Довурак); «Мерген угаанныг кадын» – Тайгана Монгуш (Сүт-Хөл); «Авыралдыг Ава кадын» – Элина Ондар (Мөңгүн-Тайга); «Салым-чаяанныг кадын» – Айзана Байкара (Бии-Хем); «Тываның эртинези кадын» – Чодураа Ондар (Кызыл хоорай); «Чоннуң үнелээн кадыны» – Чинчи-Сырга Ооржак (Барыын-Хемчик).
“Кадын-2025” мөөрейниң шаңналдыг черинче кирбейн барган кадыннарга шуптузунга тус-тузунда 10 муң рубльди тывыскан.
Онзагай мөөрей Тываның Культура, Күш-ажыл болгаш социал политика яамыларының, “Чемпионнарның чүректери” ачы-дуза фондузунуң, Москвада сураглыг ортопед Вячеслав Ондар эмчиниң, «Тоджа кемп» биле “Урянхай” турисчи баазаларның, “Алма” садыг төвүнүң болгаш өске-даа хөй санныг деткикчилерниң деткимчези-биле эрткенин организакчылары чугаалаан.
Болган мөөрейниң кол сорулгазы – херээжен кижиниң чүгле даштыкы чаражы болгаш уран-талантызын илередири эвес, чырык чер кырынга Ава кижиниң үүлезин эдилеп чоруурларга улуг хүндүткелди илередири болгаш чылдар эрткен тудум аваларның чаражы улам дендеп, бедиктерже чүткүлү дам-на немежип турзун дээш деткиири болуп турар.
Мөөрейниң кол организакчылары “Даңгына” КХН, ооң даргазы Айлана Куулар, “Кадын-2025” мөөрейниң бүгү-ле административтиг айтырыгларын харыылаар ажылды чоруткан Диана Иргит болгаш шак ындыг мөөрей эрттирер дугайында эгелекчи бодалдың автору Алёна Донгур-оол болган дээрзин сагындыраал.
/ Сорунза МОНГУШ.
Чурукту интернеттен алган.
“Шын” №47 2025 чылдың декабрь 4