Чылдың-на Чаа чыл байырлалының бүдүүзүнде ине бүрүлүг аныяк ыяштарны хоойлуга удур кезерин болдурбас дээш, хемчеглерни ап чорудуп турар. Тываның Арга-арыг болгаш бойдус ажыл-агый яамызының айтыышкыны-биле республиканың арга-арыг ажыл-агыйлары арга-арыг хоойлужудулгаларын хажыткан таварылгаларны болдурбас, демисежир база илередир дээш, арга-арыг инспекторларының дежурный графигин база ведомстволар аразының ажылчын бөлүктеринге патруль маршруттарын тургускан.
Туран болгаш Барыын-Хемчик арга-арыг эргелелдериниң инспекторлары, Россияның ИХЯ-зының Тыва Республика талазы-биле регионалдыг эргелели-биле кады «Шивилиг» биле «Ак» постулары таварты арга-арыг продукциязының сөөртүлгезинче хыналданы күштелдирген. Ведомстволар аразының бөлүктери ыяш сөөртүп турар автомашиналарны дозуп, оларның фитосанитарлыг негелделерге дүгжүп турарын хынап турар.
Арга-арыг яамызы шиви садып турар улус арга-арыг эргелели-биле садыг-саарылга керээзин чарган турар ужурлуун, аңаа кезер ыяштарының санын айтып каан болурун сагындырган. Шиви садыгжылары бараанының фитосанитарлыг документилерин болгаш санын айыткан турар ужурлуг, а садып алыкчылар ыяштарны кажан, каяа кескенин билип алыр аргалыг.
Тываның чурттакчызы аргадан Чаа чыл шивизин хоойлу ёзугаар кезип ап болурун база сагындырган. Ону кылырда, тус черниң арга-арыг черинге баргаш, садыглажылга керээзин чаргаш, ажылдакчы-биле кады чараш шивижигешти шилип ап болур. Шивиниң өртээ ооң хемчээлинден хамааржыр. Арга-арыг ажыл-агыйы-биле садыглажылга керээзин шыгжап алыры чугула, ол хоойлу езугаар ыяшты садып алганының бадыткалы болур.
Арга-арыг фондузунга когарал чедиргени дээш, арга-арыг хоойлужудулгаларын хажытканы база аныяк ыяштарны хоойлуга удур кескени дээш, РФ-тиң Административтиг кем-херек үүлгедиишкиннериниң дугайында хоойлунуң 8.28 чүүлү-биле 3 муңдан 4 муң рубль чедир административтиг торгаалды онаап болур.
Бир эвес когаралдың түңү 5 муң рубльден ажа бээр болза, Россия Федерациязының Кеземче хоойлузунуң 260 чүүлү-биле кеземче херээн оттурар.
ТР-ниң Чазааның парлалга албаны.