Таңды кожууннуң Бай-Хаак суурга «Көдээ девискээрлерниң комплекстиг хөгжүлдези» программа-биле туттунган чаа Культура бажыңының байырлыг ажыдыышкыны Чаа чылдың бүдүүзүнде болуп эрткен. Аңаа Чазак Даргазының оралакчызы Алексей Сазан-оол киришкен.
208 олуттуг чаа, делгем культура төвү 303 дөрбелчин метр шөлдүг көрүкчүлер залдыг, амгы үениң танцы залы, бөлгүмнер эрттирер болгаш өске-даа өрээлдер бар. Төпте чогаадыкчы ажылдар болгаш ажыл-агый харыылаар 12 кижи ажылдап турар.
Тываның Экономиктиг сайзырал болгаш үлетпүр яамызының дыңнатканы-биле алырга, тудугну амгы үениң негелделерин көрүп, чаңгыс аай төлевилелде кылган. Улуг делгем сценазында амгы үениң чырык болгаш үн дериг-херекселдерин эптеп салган. Төлевилелдиң ниити өртээ 234,4 сая рубль болган болза, ооң 219 сая рубльди бюджеттен тускайлаан, а 15,4 сая рубльди «Межегейхөмүр» КХН спонсорлаан.
1928 чылда туттунган эргижирээн культура бажыңныг турган кожуунга бо уттундурбас болуушкун болган. Чаа культура төвү боттарының салым-чаяанын болгаш арга-дуржулгазын сайзырадыр арганы берип, тус черниң чурттакчыларынга дыштаныр чер апаар.
«Бо болуушкун суурнуң культурлуг амыдыралын хөгжүдеринге күштүг идигни бээр. Келир чылын 98 чыл болур эрги оран-саваны эде чаартып, Таңдының драма театрынче шилчиткен. Ам чаарттынган культура төвү чаа төлевилелдер болгаш хемчеглер-биле чурттакчы чонун ам-даа өөртүр» — деп, суурнуң культура бажыңының директору Светлана Афанасьева демдеглээн.
ТР-ниң Чазааның парлалга албаны.