Тываның Баштыңы болгаш чаа соңгуттурган Камбы-лама Гелонг Лоден Шераб-биле ужуражып тура, республикада шажын өөредии болгаш буддийжи чырыдыышкын адырында кады ажылдаарын дугурушкан. Ол ышкаш 2026 чылдың август айда болур IV делегей чергелиг буддийжи шуулганга белеткелди чугаалашкан.
Владислав Ховалыг шуулганга белеткел айтырыгларын чугаалап тура, делегей чергелиг улуг хемчегни белеткээринге болгаш эрттиреринге сарыг шажын чүдүкчүлериниң болгаш Камбы-лама эргелелиниң ролюн онзалап демдеглээш, ол чүгле шажын-чүдүлгениң улуг болуушкуну эвес, а республикада эртем, культура, туризм хөгжүлдезинге улуг идигни бээрин айыткан.
Ийи тала шуулганга белеткенирде, Бурятияга болгаш Калмыкияга эрткен арга-дуржулганы кончуг таптыг өөренип көөрүн дугурушкан. Шуулганны бедик деңнелге эрттирери чүгле эрге-чагырганың талазындан күжениишкиннер эвес, а ниитилелдиң болгаш республиканың чурттакчыларының деткимчези херек апаар дээрзи билдингир.
Камбы-лама Гелонг Лоден Шераб Тываның чону база хөгжүлдези дээш бодунуң талазындан бүгү-ле күш-ажылын бараалгадырынга беленин илереткен.
Октябрь эгезинде республиканың буддийжи шажын-чүдүлге төлээлериниң бадылаашкыны-биле Гелонг Лоден Шераб (анаа ады Уржанай Долаан Александрович), азы чон ортузунда нептерээн ады Долаан башкы Тываның буддийжилериниң баштыңы кылдыр соңгуткан.
Гелонг Лоден Шераб Индияның Дрепунг Гоманг хүрээзинге буддийжи дээди эртемге четкен. Чоокта чаа өөредилге лицензиязын алган Кызылда Тубтен Шедруб Линг буддийжи хүрээзинге бо хүннерде ажыттынар Россияның буддийжи университединиң ректору кылдыр Лоден Шераб хелиң ажылдаар.
Медээни болгаш чурукту ТР-ниң парлалга албанындан алган.