Владислав Ховалыг 17 регионнуң губернаторлары болгаш делегациялары-биле кады СберУниверситединиң организастааны «Кижиге архитектура» деп программазының ийи хонуктуң лекция курузунга киришкен. Программаны Президент академиязының күрүне эргелеп-башкарылгазының дээди школазы-биле кады боттандырып турар. Төлевилел чаңчылчаан тудуг ажылдарын амгы үениң технологиялары-биле каттыштырып, кижиже угланган хамаарылганы архитектура болгаш хоорай тудуунда нептередип турар деп, республика Баштыңы бодунуң Телеграм каналында тайылбырлаан.
Программаның кол сорулгазы – кижилерниң чурттаар болгаш ажылдаар күзелин оттурар черлерни тудар болгаш организастаары. Бүгү делегейден хоорайларның ындыг тудуундан эки чижектерни киржикчилерге таныштырган. Удуртукчулар Москваның бодунуң арга-дуржулгазындан, чижээ, практика кырында чаа аргаларны ажыглаан Рублево-Архангельский микрорайонда СберСити смарт-районунда хоорай тудуушкунунда кижиге угланган үндезиннерни база билип алганнар.
«Алган билиглеривисти ажылывыска ажыглаар бис. Тывага таарымчалыг хоорай хүрээлелин тургузары – бистиң доктаамал шиитпирлеп турарывыс кол айтырыгларывыстың бирээзи. "Амыдыралга инфраструктура" национал төлевилелдиң "Таарымчалыг хоорай хүрээлелин тургузары" федералдыг төлевилел-биле 2025 чылда республикада 30 хөй-ниити девискээрлерин чаарткан, а Россияның эң эки төлевилелдер мөөрейинге Кызыл, Шагаан-Арыг, Туран хоорайларда 3 төлевилел тиилээш, боттанып турар. Беш чыл дургузунда 170 ажыг хөй-ниити шөлдерин чаагайжыткан. Ол угланыышкынга ажылдар ам-даа уламчылаар» — деп, Тываның Баштыңы дыңнаткан.