Владислав Ховалыг Кызылдың Вавилин ээтпээ микрорайонунда социал объектилер тудуун хынаан. Амгы үеде ол микрорайонда уруглар сады болгаш спорт залды тудуп турар. Кызыл – Кара-Хаак оруунда орук айыыл чок чоруун хандырар дериглерни тургузар ажылдар кидин түлүк.
«Бистиң Президентивис Владимир Владимирович Путинниң ажытканы чаа школаны долгандыр өске-даа социал инфраструктура объектилерин тудуп турар бис: бо чылын «Өг-бүле» национал төлевилел-биле 280 олуттуг уруглар садын, ол ышкаш спорт-фитнес төвүн тудуп эгелээн бис. Дараазында поликлиника бажыңын тудары планнаттынган. Уруглар садының тудуу 2027 чылда доостур болза, келир чылын спорт залы ажыглалче кирер» — деп, Тываның Баштыңы бодунуң телеграм каналында дыңнаткан.
«Өг-бүле» деп национал төлевилел ёзугаар өөредилге черлеринге немелде олуттарны тургузуп, уругларны эки байдалдар-биле хандырар дээш Вавилин ээтпээнде 280 уругга чаа садты тудуп турар.
«Бизнес-спринт» (Спортту шилип алыр мен) федералдыг төлевилел ёзугаар күш-культура спорт залының тудуу чоруп турар. Ол чаңгыс каът оран-саваның ниити шөлү 850,19 дөрбелчин метр болур. Залга мини-футбол, волейбол, баскетбол ойнаар шөлдерни дериир. Немей туткан черинге вестибюль, херээжен болгаш эр улустуң солуттунар өрээлдери, тренерлер болгаш техниктиг өрээлдер, арыгланыр черлер турар.
Владислав Ховалыг Кызыл – Кара-Хаак оруун хынап чорааш, ооң шынарынче онза кичээнгейни угландырган, чүге дизе микрорайон-биле хоорайны тудуштурган ол орукта транспорт шимчээшкини дыка улуг. Амгы үеде оруктуң 6,5 километрден 10-гу километринге чедир участокта эде чаартылга ажылдары чоруп турар. Ону «Амыдыралга инфраструктура» национал төлевилел ёзугаар чорудуп, оруктуң айыыл чок чоруунуң дериг-херекселдерин тургузуп чаагайжыдар.
«Планда чадаг кижилер эртер тос черни, 18 автобус доктаамын, 9-ку километринге бир светофорну база 24 орук белдирлерин кылыры көрдүнген. Чадаг кижилер кылаштаар черлерни база албан кылыр» — деп, Владислав Ховалыг дыңнаткан.
ТР-ниң Чазааның парлалга албаны.
