Октябрь 19-та Россияның Президентизи Владимир Путин Айыыл чок чорук Чөвүлелиниң хуралын эрттиргеш, мобилизацияже келдирткен хамаатыларга болгаш оларның өг-бүлелеринге деткимче көргүзериниң айтырыгларының талазы-биле даалгалар даңзызын бадылаан. Ында харыысалгалыг кижилерниң, ооң иштинде субъектилер удуртукчуларының хүлээлгелерин айтып каан.
Шак ынчалдыр, Россия Федерациязының субъектилериниң дээди албан-дужаалдыг кижилери шериг албан-хүлээлгеже мөөңнеткен Россияның хамаатыларының паараңнаар черлерин, оларның оон-даа өске материал-техниктиг хандырылгазын, а ол ышкаш ындыг хамаатыларның белеткелиниң болгаш өөредилгезиниң талазы-биле ажыл-хемчеглерни организастаарынга деткимче көргүзерин дааскан.
«Тываның девискээринге мото-адыгжы бригада шагда-ла турган болгаш, долу эвес мобилизацияның эгезинден тура паараңнаар чер айтырыын шиитпирлепкен бис. Мөөңнеткеннерниң хөй кезии ам-даа ында өөредилгени эртип турар. Республикадан база бир бөлүк Новосибирскиде белеткелди эртип турар. Бис бригаданың, Төп шериг округунуң командылалы-биле доктаамал харылзаада бис, ооң иштинде материал-техниктиг хандырылганың айтырыгларының талазы-биле” деп, Тываның Баштыңы Владислав Ховалыг бодунуң арынынга бижээн.
Оон аңгыда, Россияның Президентизи мобилизация-биле келдирткен хамаатыларга болгаш оларның өг-бүлелеринге социал деткимче көргүзериниң комплекстиг хемчеглерин боттандырарын субъектилер удуртукчуларынга дааскан. Мооң-биле холбаштыр Владислав Ховалыг чаңгыс аай республика штавының идепкейлиг туружунга ынанып турар, мында янзы-бүрү адырларның специалистериниң ажыл-ижин уштап-баштаар эки система тургустунган.
Тываның Баштыңы, оон аңгыда, харыысалгалыг кижилерден - удуртукчулардан мөөңнелгеже келдирткеннерниң бадылаттынган даңзызын дарый тодарадырын, республикада доктаадып тургускан 100 муң рубль хемчээлдиг чаңгыс удааның акша төлевирлерниң дүрген шилчидерин негээн дээрзин медеглээн.
А. ХЕРТЕК белеткээн.