Тываның Баштыңы Владислав Ховалыг Калмык Республикага барып чораан. Калмыкияның Баштыңы Бату Хасиков ону социал четкилерде бодунуң албан езузунуң блогунда чаңгыс чер-чурттугларынга дыңнаткан. «Тыва Республиканың Баштыңы Владислав Товарищайович Ховалыгны калмык черге уткуп алганымга өөрүп тур мен» — деп, ол бижээн.
Калмыкия биле Тываның чоннарын ниити төөгүзү болгаш культурлуг дөмейлешкээнден аңгыда, дайынчы хей-аъды доңнап турарын Бату Хасиков демдеглээн. Шаг төөгүден бээр тываларның болгаш калмыктарның өгбелери Ада-чуртту камгалаары-биле эгин кожа туржуп чораан, бөгүнде ол алдарлыг чаңчылдарны уламчылап турар.
Хасиковтуң демдеглээни-биле алырга, Калмыкия сүлде-сүзүк харылзааларын уламчылап, келир 2026 чылда Кызылга болур IV делегей чергелиг буддийжи шуулганның эстафетазын Тывага дамчыткан. «Бо шуулган бедик деңнелге эртип, бүгү буддийжи делегейге онзагай болуушкун болзун дээш, бодувус талавыстан бүгү-ле дузаны болгаш деткимчени көргүзер бис» — деп, Калмыкияның Баштыңы немээн.
Бату Хасиков ийи республиканың аразында кады ажылдажылганың чугулазын база демдеглээн: «Бистиң регионнарывыс бот-боттарын деткижип, кады ажылдап турар. Чаңгыс демивис быжыг болган тудум, келир үеже бүзүрел-биле көөр бис».
Калмыкия-биле Тыва чүгле быжыг харылзаалыын бадыткаан эвес, а регионнар болгаш культуралар аразында хамаарылганы, ылаңгыя буддийжи езу-чаңчылдарны улам хөгжүдеринге беленин тус черниң медээ агентилелдери демдеглээн.
Эрткен неделяда Тыва Калмыкияның баштыңчызын бодунуң черинге уткаан: Бату Хасиков октябрь 23-те Кызылга бир дугаар Российжи буддийжи университеттиң ажыдыышкынынга киржип, Азияның төвүнге бир дугаар аалдап келгенин сагындыраал. Хасиков байырлыг езулалда хүндүлүг аалчы болуп Россияның сарыг шажын чүдүлгелиг регионарының бирээзин төлээлээн. Ол чорааш, Калмыкияның Баштыңы бо чылын Элиста хоорайга болуп эрткен III-кү делегей чергелиг буддийжи шуулганның демдектерин шуткаан статуэтканы Тываның Баштыңынга дамчыткан.
ТР-ниң Чазааның парлалга албаны.