Тывага чаңгыс хүнде 106 соңгулда болур. Оларның аразында — Дээди Хуралдың (парламентиниң) дөрткү чыыжының база муниципалдыг деңнелге 105 соңгулда болур. Республиканың сес кожуунунга, Шагаан-Арыг хоорайга болгаш 64 көдээ сумуларга төлээлекчилер органнарының депутаттарының соңгулдалары, ооң иштинде 32 депутаттың немелде соңгулдазы болур.
Тыва Республиканың Соңгулда комиссиязының даргазы Лариса Андалаеваның чугаазы-биле алырга, соңгукчулар 814 депутатты соңгуур, ооң иштинде Дээди Хуралдың 32 база муниципалдыг тургузуглар Хуралдарының 782 депутадын соңгуур. Дээди Хуралдың депутадынга кандидаттарны июнь 8-тен июль 24-түң 18.00 шакка чедир идип үндүрер. Партияларның азы соңгулда каттыжыышкыннарының идип үндүрген кандидаттарын агитация үези кандидаттың депшиттирген дугайында билдириишкинин хүлээп алган соонда эгелээр болгаш сентябрь 7-ниң дүн ортузунда доостур.
Телевидение, радио, парлалга үндүрүлгелеринге база Интернетке соңгулда мурнунуң агитациязы август 10-дан эгелээш, сентябрь 7-ниң дүнезинде доостур. Соңгулда бетиниң материалдарын салып болур күрүнениң регионалдыг массалыг информация чепсектериниң даңзызын Тыва Республиканың Соңгулда комиссиязының, «Тыва» КТРК, «Тува 24» сайтыларынга үнген, «Тувинская правда», «Шын» солуннарга июнь 22-де парлаттынган.
Соңгулда чаңгыс хүн дургузунда — сентябрь 8-те 8.00 шактан 20.00 шакка чедир болур. Соңгукчулар оран-сава иштинге, даштынга соңгуп болур, ол ышкаш чедери берге база ыраккы черлерге баш бурунгаар соңгуп болур. Турар чериниң аайы-биле бадылаар арганы бээри-биле, «Мобильдиг соңгукчу» деп системаны база ажыглаар.
Турар чериниң аайы-биле бадылаар дугайында билдириишкиннер хүлээп алыр 225 пункт ажылдаар. Июль 24-тен сентябрь 4-ке чедир 19 девискээр соңгулда комиссияларының баазазынга, 19 МФЦ салбырларынга база «Госуслуги» порталын таварыштыр пунктулар ажыттынар. Август 28-тен сентябрь 4-ке чедир 187 соңгулда участогунуң комиссиялары билдириишкиннерни хүлээр.
ТМГ-ниң медээзинден алган.
“Шын” №51 2024 чылдың июль 10
![](https://sun9-38.userapi.com/impg/STG_0ZsFX2kGS-6mhT4Wcf6uSA2dH4o3eiep5g/nZqP_rnL3ys.jpg?quality=95&as=32x35,48x52,72x78,108x117,160x173,240x259,360x388,480x518,540x583,640x690,720x777,1001x1080&sign=a553cd0b1507791b917d8323f16508c1&from=bu&u=-rVqvAvpJcfD8OGzrtHdRaq4vIT5aS2PGQc9AYae4-k&cs=560x604)