РФ-тиң 2021 чылдың июнь 29-та 386 дугаарлыг Россияның дужаалын күүседири-биле «Тыва Республиканың эм үнүштери» деп экспедиция ажылдарын Тываның болгаш Томскунуң күрүне университеттериниң башкылары болгаш студентилери кылган.
Томск күрүне университединиң профессору Андрей Пяканың удуртулгазы-биле Мөңгүн-Тайга, Өвүр, Улуг-Хем, Чаа-Хөл, Бии-Хем, Таңды болгаш Эрзин кожууннарынга экспедицияны кылган.
Республиканың эм үнүштерин шинчилеп, тус черлерниң чурттакчыларындан ук үнүштерни канчаар, кандыг аарыгларга ажыглап турарының дугайында улусчу медицинага хамааржыр ажыктыг медээлерни эртемденнер чыгган. Оон аңгыда, гербарий кылыр оът-сигенни, ховар үнүштерни, эм үнүштерниң үрезиннерин чыып алганнар.
«Кандыг үнүштерже кичээнгей салырын, кандыг үнүштерни чыырының дугайында даңзыны баш бурунгаар тургузуп каан турган. Амгы үеде ук үнүштерниң биологтуг, экологтуг болгаш эм шынарларын шинчилеп турар бис» – деп, эртем шинчилел ажылы чорудуп турар экспедицияның удуртукчузу Анета Ооржак чугаалаан.
Шинчилел ажылдары Күжүгет Шойгу аттыг культурлуг фондунуң чагыы-биле, ооң ачызында болган дээрзин демдеглээли.
А. Ондар белеткээн.