Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Россияның Президентизи Владимир Путинниң адынче кирген дилеглерге даянып, Тыва Республиканың хамаатыларын видеохарылзаа дамчыштыр хүлээп алган. Тываның Баштыңы Владислав Ховалыг хамаатыларның видео-хүлээп алыышкынынга киришкен. Хүлээп алыышкын үезинде Тываның алды чурттакчызындан социал айтырыгларга хамааржыр дилеглер кирген.
Кызылдың «Вавилин ээтпээ» микрорайонунуң чурттакчылары ол чер девискээринге уруглар садын тударын дилээн. Дилег киирикчилериниң дыңнадыы-биле алырга, дүрген хөгжүп турар микрорайонда аныяк өг-бүлелер хөй, ынчалза-даа ында школа назыны четпээн өөредилге албан черлери чок.
«Өг-бүле» национал төлевилелдиң «Өг-бүлеге деткимче» федералдыг төлевилел күүселдези-биле «Вавилин» микрорайонунда 280 олуттуг уруглар садының тудуун 2027 чылда доозары планнаттынган. Амгы үеде ону тудар тудуг компаниязын тодарадып турар.
Кызылдың чурттакчызы Алдынай Ооржак хоорайның Ооржак Лопсанчап кудумчузунда бажыңнарның бо-ла үрели бээр лифт дериг-херекселдерин солуп бээрин дилээн, эрткен чайын ону солуур план турган, ынчалза-даа ажыл кылдынмаан. Ол айтырыгны хөй аал чурттаар бажыңнарның капиталдыг септелгезиниң регионалдыг фондузу шиитпирлеп турар, ол амгы үеде төлевилел-смета документациязын тургузары-биле электроннуг аукционну чарлаан. Чогумчалыг түңнелди алган соонда, лифт дериг-херекселдерин солуур ажылдарны планнаан.
Б.И. Араптан аттыг Сукпак ортумак школазынга капитал септелгеден кылып бээр дугайында чаңгыс чер чурттугларының дилээн Ээлдек Донгак дамчыткан. Школаның ийи каът бажыңы эргижирээн. Дыка үр үе иштинде улуг септелге кылдынмаан. Билдириишкин киирген кижиге школада чаартылга ажылдары чоруп турарын дыңнаткан. «Спецстроймонтаж» КХН тудуг организациязы федералдыг программа күүселдези-биле школаның капиталдыг септелгезин чорудуп, иштики шеверлел ажылдарын кылып турар. «Чаа өөредилге чылында уруглар амгы үениң негелделеринге дүгжүп турар школага өөренири чугула» – деп, бүрүн эргелиг төлээ чугаалаан.
Лариса Михайловна Чаш-оол Бии-Хем кожууннуң Хадың суурунуң чурттакчызы. Федералдыг Р-257 автооруктан оларның суурунга чедир оруктуң багай байдалы дээш чурттакчылар сагыш човап турарын дыңнаткан. Регионалдыг эрге-чагырга «Амыдыралга инфраструктура» национал төлевилел күүселдези-биле бо чылын септээр объектилер даңзызынче орук участогун киирген. Амгы үеде «Восток» КХН орук организациязы белеткел ажылын чорудуп, эрги асфальт шывыын адырып турар. Ооң соонда асфальт-бетонну чадып, чаагайжыдылганы кылыры (чырыкты эптеп, чадаг кижилер эртер черлерни тускайлап, демдектерни тургузары) планнаттынган. Ноябрь 25-ке чедир ажыл доостур.
Торгалыг суурнуң чурттакчызы Наталья Тазытыевна Санчы бодунуң суурунга чаа амбулаторияны тударынга деткимчени көргүзерин дилээн. Амгы үеде суурда эмнелге кабинеди бар, ол 1960 чылда туттунган аварийлиг эмнелге бажыңында турар. А суурда пенсионерлер болгаш ажы-төлдүг өг-бүлелер дээш, 1 муң ажыг кижи чурттап турар. Регионалдыг Кадык камгалал яамызының дыңнатканы-биле алырга, бо чылын аңаа тудуг-монтаж ажылдары эгелээр.
Шагаан-Арыгның уругларның уран чүүл школазының фортепиано башкызы болгаш концертмейстери Людмила Борисовна Стороженко база бүгү коллектив уругларның уран чүүл школазынга чаа оран-саваны шагда-ла күзеп келгеннер. Бо өөредилге чери 1963 чылда туттунган болгаш, амгы үениң негелделеринге дүүшпес. «Көдээ черлерниң комплекстиг хөгжүлдези» күрүне программазынга киришкениниң ачызында, бо чылын 150 олуттуг уругларның чаа хөгжүм школазының тудуу эгелээн. 2025–2026 чылдарда тудугну тудар. Тудуг организациязы амгы үеде белеткел ажылдарын кылып, объектиниң девискээрин херимнээн, ол ышкаш тудуг материалдарын кээрин манап турар.
Анатолий Серышев хууда хүлээп алыышкынын доозуп тура, хамаатыларга идепкейлиг амыдыралчы туружу база социал инфраструктураны тургузарынга болгаш боттарының чурттап турар черлерин чаагайжыдарынга хамаарышкан айтырыгларны шиитпирлээринге киржилгези дээш өөрүп четтиргенин илереткен.
ТР-ниң Чазааның парлалга албаны.
А.ЕНЗАКТЫҢ тырттырган чуруктары.
