Тыва Республикадан ийи бүдүрүлге - «Туваавтотранс» КХН биле «Ресурсы» КХН «Тулган барааннар болгаш ачы-дузалар - ГЕММА 2024» деп билдингир делегей конкурузунуң шилилделиг кезээн чедиишкинниг эрткен. Чылдың-на эрттирип турар мөөрейниң 23 дугаар шилилде чадазының тиилекчилери «ГЕММА» деп алдын медальдарны алырын чарлаан.
Тываның Баштыңы Владислав Ховалыгның эгелээшкини-биле пассажирлер аргыштырылгазының системазын эде чаартыр дээш 2022 чылдың августа «Туваавтотранс» КХН бүдүрүлге тургустунган. Ол регион девискээринде автобустуг пассажирлер аргыштырылгазының адырында бедик шынарлыг ачы-дузазы дээш “Ачы-дузалар” номинацияга тиилээн.
«Туваавтотранс» КХН бүдүрүлге бедик шынарлыг ачы-дузазы дээш чаңгыс эвес катап шаңналче кирген. Эрткен чылын ол-ла делегей чергелиг мөөрейниң тиилекчилериниң бирээзи болган. Амгы үеде компания Кызыл агломерациязында база Тываның муниципалдыг тургузуглар аразында пассажирлерни аргыштырып турар.
«Ресурсы» КХН – тудугнуң таваанга база ханаларынга ажыглаар блоктарны, ол ышкаш бетонну бүдүрүп турар. 2015 чылда тургустунган бүдүрүлге Тывада тудуг материалдарының рыногунда кол черни ээлеп турарларның бирээзи. Компания бетон блоктар продукциязын киириштиргеш, «Чемге хамаарышпас хереглелдиг база бүдүрүлге-техниктиг ажыглалдыг продукция» категорияга тергиин адын база катап бадыткаан.
Россия болгаш Беларусьтуң экономиказының аңгы-аңгы адырларында ажылдап турар 70 ажыг компания 2024 чылда конкурстуң шилилде кезээнге тиилээш, «ГЕММА» алдын медальдарны чаалап алган. Ол бүдүрүлгелер хамаарышпас экспертизаны эрткеш, боттарының чижилгелиин бадыткаан. Шилилде турнуң тиилекчилери 2025 чылдың апрельде болур конкурстуң түңнел чадазында боттарының регионнарын төлээлээр.
Төлевилелдиң хамаарышпас эксперт үнелелиниң кол негелделери болза, хереглекчилерниң амгы үеде сонуургалдарынга дүүштүр, делегей рыногунда шынар талазы-биле сөөлгү чедиишкиннерни ажыглаары, бизнес ажыл-чорудулгазын организастаарын үргүлчү сайзырадып, деңнелин көдүрери болур.
2022 чылдан бээр Россияда, бо чылдан эгелеп Беларусь Республикада эрттирип турар «Тулган барааннар болгаш ачы-дузалар - ГЕММА» конкурс амгы үениң технологияларын ажыглап база бедик шынарлыг продукция бүдүрүп база ачы-дузалар көргүзүп турар перспективтиг болгаш чижип шыдаар бүдүрүлгелерни деткиир угланыышкынныг. Төлевилел делегейниң 64 чурттарын хаара туткан, база Кыдат биле Бразилияда албан езузунуң төлээлерлиг.