«Алдын-Булак» этнокультура комплекизинге чылдың-на болуп турар «Тываның командазы–2030» деп аныяктарның ээлчеглиг өөредиглиг шуулганы доозулган.
Бо чылын ол онзагай болуушкун Тываның шупту кожууннарындан 100 ажыг аныяктарны — сайгарлыкчы ниитилелдиң, аныяктарның хөй-ниити организацияларының төлээлерин, волонтёрларны, студентилерни чыгган. Сентябрь 19-тан 21-ге чедир үш хонук дургузунда шуулганның киржикчилери мастер-класстарны, тренингилерни, лекцияларны болгаш сайгарлыкчылар, эксперттер, хөй-ниити ажылдакчылары, чазак болгаш бизнес төлээлери-биле ужуражылгаларга киришкеннер.
«Тываның командазы–2030» дээрге төлевилел боттандырыышкынынга чүгле өөредилге шөлү эвес, а Тыва Республиканың Чазаандан грант деткимчезин алыр арга-дыр.
Шуулганның байырлыг ажыдыышкынында Тыва Республиканың Чазааның Даргазының оралакчызының хүлээлгезин күүседип турар Айдыс Сынаа Тываның Баштыңының өмүнээзинден чыылганнарга байырны чедирген. Өөредилге сайыдының хүлээлгезин күүседип турар Орлан Соян, Дээди Хуралдың (парламентиниң) депутаттары Начын Чамбалдоо биле Людмила Осмоловская, Тываның Аныяктар парламентизиниң даргазы Иргек Товарищтай, “Чалыы армейжилерниң" удуртукчузу Айдың Шивидек олар база сөстү алганнар.
“Аныяк сайгарлыкчылар клуву” төлевилелдиң регионалдыг төлээзи, “StudHallдуң” үндезилекчизи Анастасия Бородина, “Созидание” кижи капиталын хөгжүдер төп автономнуг коммерцияга хамаарышпас организацияның директору, «Экономиканы чедингир дыл-биле» төлевилелдиң удуртукчузу Наталья Гросс, Красноярск крайның Аныяктар Чазааның дублёрлар даргазы София Чумак болгаш Сибирьниң федералдыг университединиң специализи, Красноярск крайның Аныяктар Чазааның чөвүлекчизиниң дузалакчызы Никита Рыдин эксперттер кылдыр шуулганга киришкен.
Тываның Аныяктар херектериниң талазы-биле яамының дыңнатканы-биле алырга, социал болгаш бизнес адырже угланган бежен ажыг төлевилелдер грант деткимчезинче кордап киришкен.
2017 чылда шуулган эгезин салган дээрзин сагындыраал. Оон бээр 1500 хире киржикчи ниитизи-биле 17,5 сая ажыг рубль түңнүг саң-хөө дузазын алганнар.
Медээни болгаш чурукту Тываның Чазааның парлалга албанындан алган.
“Шын” №37 2025 чылдың сентябрь 25