Республикада тускай шериг операциязының киржикчилеринге деткимче көргүзеринче угланган «Тываның маадырлары» төлевилелдиң боттанылгазы уламчылап турар. Тыва Республиканың күш-ажыл болгаш социал политика сайыды Эдуард Сандан ук төлевилелди деткип, ооң киржикчизиниң дагдыныкчызы болган.
Өөредилгезиниң практиктиг чадазында Күш-ажыл болгаш социал политика яамызынга стажировканың программазы ведомствонуң ажыл-ижи-биле таныжары база ТШО киржикчизиниң удуртулга ажылын сайзырадырынче угланган. Программаның киржикчизи Айлана Биче-оол яамының тургузуун чедиишкинниг шиңгээдип алган, ол ышкаш чурттакчы чоннуң социал хандырылгазы, күш-ажыл төлевири болгаш камгалалы, өг-бүле политиказы база чурттакчы чонну ажылга хаара тудары дээн ышкаш адырның ажыл-чорудулгазының угланыышкынын өөренген. Регионнуң социал албан черлериниң ажыл-ижи-биле база таныжар аргалыг болган. Үнүүшкүннүг хемчеглер чугула рольду ойнаан.
«Тываның маадырлары» төлевилел Владимир Путинниң эрткен чылын тускай шериг операциязының хоочуннарынга болгаш амгы үеде дайынчыларынга чарлаан «Маадырларның үези» деп президентиниң кадрлар программазының регионалдыг хевири-дир. Бистиң сорулгавыс — ТШО киржикчилеринге болгаш хоочуннарынга боттарының билиин, дуржулгазын база лидер шынарларын тайбың амыдыралга ажыглаарынга таарымчалыг байдалдарны тургузары. Стажировканың бирги чадазы Айлана Андреевнаның ажыл-ишке бедик сонуургалын болгаш харыысалгазын көргүскен. Ол яамының ажыл-чорудулгазынга сонуургалын көргүзүп, нормативтиг бааза болгаш медээлер анализин өөрениринге база практиктиг айтырыглар сайгарылгазынга идепкейлиг киришкен. Ооң алган билии дараазында профессионал өзүлдезинге кол өзек болур дээрзинге бүзүреп тур мен»— деп, Эдуард Сандан чугаалаан.
«Күш-ажыл болгаш социал политика яамызынга стажировка эрткеш, дыка улуг дуржулганы алдым. Социал адырның хөгжүлдезинче, ол ышкаш өг-бүле политиказын быжыглаар болгаш деткимче көргүзеринче угланган ведомствонуң ажылы меңээ чоок болгаш ылап-ла солун болду. Ажыл-агыйның угланыышкын бүрүзү ужур-уткалыг-дыр. Өөредилгемниң бирги чадазында дыка хөй чаа билиглерни алдым. Бажың-интернаттар болгаш социал төптерже үнүүшкүннерге киришкенимни онзалап демдеглээр-дир мен. Амыдыралында берге байдалга таварышкан хамаатыларга деткимче көргүзеринге эң-не чугула болгаш ажыктыг ажылды яамы чорудуп турарын көөр аргалыг болдум. Күш-ажыл яамызы чурттакчы чоннуң камгалал чок категориязынга чогуур өйүнде боттуг деткимчени көргүзүп, ону профессионалчы болгаш улуг харыысалга-биле күүседип турарын ылап-ла көрдүм» — деп, Айлана Биче-оол онзалап демдеглээн.
ТР-ниң Күш-ажыл болгаш социал политика яамызының медээзинден алган.
“Шын” №48 2025 чылдың декабрь 11