Тываның продуктулары — «Россияның 100 тулган барааннар» санында

Чурттуң тулган барааннарының санынче тыва бүдүрүкчүлерниң дөрт продуктузу кирген. 2022 чылдың «Россияның 100 тулган барааннары» бүгү-российжи мөөрейже республиканың бүдүрүлгелери дөрт аъш-чем продукциязын киириштиргенин, ТР-ниң Көдээ ажыл-агый болгаш аъш-чем яамызы дыңнаткан.

«Тыва чем бүдүрүлгезиниң төвү» КХН-ниң «Ава шайы» суксуну, Мөңгүн-Тайга кожууннуң «Мөген-Бүрен» КУБ-туң хой болгаш өшкү эъдинден продукциязы «лауреат» аттарга төлептиг болган. Оон аңгыда, Мөңгүн-Тайга кожууннуң «Арзайты» көдээ ажыл-агый хереглекчилер кооперативиниң сарлык эъдинден “Мөген-Бүрен” консервазы база Улуг-Хем кожууннуң «Оргаадай» көдээ ажыл-агый кооперативиниң хоорган тараадан “Тыва далганы” мөөрейниң дипломантылары болган.

Мөөрейниң тиилекчилери ийи чыл иштинде боттарының продукциязынга киришкен чылын айытпышаан, программаның ылгавыр демдээн ажыглап болур. Мөөрейге тиилээри рынокче бараанын үндүр садарынга дээштиг идигни алыр маркетинг аргазы-дыр деп, Көдээ ажыл-агый яамызы тайылбырлаан.

Эрткен чылын мөөрейниң «Аъш-чем барааннары» деп угланыышкынынга «Дипломант» атты дөрт тыва продукт алганын сагындыраал. «Бай-Хаак» КХН-ниң (Таңды кожуун) бүдүргени “Персик амданныг соок шай” суксуну, тайга тооруктуг «Тываның алдыны» сүтсүг шоколады («Серебро» КХН, Кызыл хоорай), «Боорзак» далгандан кылыглары (Хертек В.В. ХБ, Кызыл хоорай) база пастеризастаан ижер инек сүдү (Оюн Ч. Х.-Д. ТАА ХБ, Таңды кожуун) чылдың тергиин чүс барааннарынче кирген.

«Россияның 100 тулган барааннары» — Бүгү-российжи программа. Ооң кол сорулгазы – ада-чурт продукциязы болгаш ачы-дузаларының шынарын, чижилгезин бедидер дээш бүдүрүлгелерни болгаш организацияларны деткип, менеджмент системазынче киирип, ону хөгжүдер. Мөөрей 20 ажыг чыл дургузунда доктаамал эртип турар. «Шынар айтырыгларының академиязы» регионнар аразының хөй-ниити организациязы, Техниктиг өйлээшкин болгаш метрология талазы-биле федералдыг агентилел (Росстандарт) база «Росшынар» коммерцияга хамаарышпас акционерлиг организация – ооң организакчылары.