Ол дугайында Тываның Баштыңы Владислав Ховалыг дыңнаткан. Өөредилге черлериниң директорлары кижизидилге болгаш уругларның хөй- ниити организациялары-биле ажыл чорудар чөвүлекчилерлиг болур. 2023 чылда 200 кижини белеткээр болза, 2024 чылда- 210.
Республикада улуг улустуң талазындан уругларга хамаарышкан болгаш назы четпээн уруглар аразында кем-херек үүлгедиишкиннерин болдурбазы-биле баш бурунгаар ажыл чорудулгазының анализи уламчылап турар.
“Уругларның хостуг үезин шын ажыглаары-биле ажылды хөй янзы болдурар болгаш ынаар хаара туткан уругларның санын ам-даа көвүдедир. Чаңчыл болу берген школа чанының база стационарлыг лагерьлерден аңгыда, чаа хевирниң чүүлдерин тывар болзувусса эки. Чүгле 100 хуу көргүзүг чедип алыр дээнивис, байдалды экижитпейн турар болганда, “хевири- утказы- түңнели” деп схемаже чүткүп ажылдаар. Кожууннарда назы четпээн уруглар-биле ажыл чорудар комиссияның даргаларынга ол-ла кожууннуң удуртукчуларын томуйлаар болза эки дээн саналды деткиир-дир мен. Бо түр каданың хемчеглери-дир. Бир эвес девискээринде болуп турар бүгү болуушкуннар дээш харыысалганы алган соонда, тодаргай системажыткан ажылын аайлап, тургузар ужурлуг. Ооң соонда, дуржулгалыг, тускай мергежилдиг кижиге дагзып кагзын” – деп, Тываның Баштыңы Владислав Ховалыг бижээн.
Шыңгыы кичээнгейни уругларның сагыш-сеткилиниң байдалынче угландырары негеттинип турар. Владислав Ховалыгның дыңнадып турары-биле алырга, Тываның Кадык камгалал яамызы “Тыва Республиканың бичии чурттакчыларының психиктиг кадыкшылының камгалалы” деп регионалдыг программаны ажылдап кылган. Ук программа 2025 чылга чедир көрдүнген. Ол документ амдыызында чөпшээрежилге чадаларын эрттип турар.
“Уруглар аразында сагыш-сеткил сандараашкынынга хамаарышкан аарыгларны эвээжедиринден аңгыда, бодунуң амызынга четтинер чоруктуң когун үзер дээш шупту кызып ажылдаар ужурлуг бис” –деп, Тываның Чазак Баштыңы дыңнаткан.
