10 чыл бурунгаар Тываның күрүне университединде Россияның студентилер отрядтарының регионалдыг салбыры ажыттынып келген. Бо үе дургузунда университеттиң студентилери республиканың объектилеринде болгаш Бүгү-российжи студентилер ажылдаар тудугларга ажылдап келген.
Октябрь 17-де Улусчу чогаадылга бажыңынга Россияның студентилер отрядының Тывада регионалдыг салбырының үрде манаан байырлыг кежээзи болуп эрткен. Тываның студентилер отрядтарынче республикавыстың кара чаңгыс дээди өөредилге чериниң студентилери кирип турар. Олар регионнуң эң-не идепкейжи, бурунгаар үзел-бодалдыг, республиканың келир үеде идегели, бүзүрели болур аныяктары-дыр. Оларны дайынчылар деп адааны база бир онзагай болган. Студентилер отрядтарының төлээлерин оларның башкылары, хоочуннар болгаш хөй санныг эш-өөрү байыр чедирип чедип келгеннер.
Тываның күрүне университединиң Аныяктар политиказының эргелелиниң даргазы Мария Сергеева университеттиң удуртулгазының мурнундан байыр чедирип, сөстү алган: “Хөй чылдар дургузунда чаңгыс угланыышкынныг боданып, өскелерге дузаны, деткимчени кадып, Тываның студентилер отрядтарының шимчээшкинин сайзырадып келгениңер дээш өөрүп четтирип тур мен”.
Тыва Республиканың Эртем талазы-биле агентилелиниң директору Алена Стороженко, Тыва Республиканың Аныяктар политиказының талазы-биле агентилелиниң директору Эртине Куулар база чылыг-чымчак сөстерни, чаагай күзээшкиннерни чугаалаан.
“2012 чылда Аныяктар политиказы болгаш Спорт яамызының эгелекчи саналы-биле университеттиң ынчангы кижизидилге ажылының талазы-биле проректору Алена Стороженко-биле кады студентилер отрядын тургузар деп шиитпирни хүлээп алган бис. Баштай ректорнуң дужаалы-биле университеттиң баазазынга студентилер отрядын ажыткан бис. Ол-ла чылын коммерциялыг эвес албан чери ажыттынган” – деп, Мария Сергеева чугаалаан.
10 чыл дургузунда студентилерниң күш-ажылчы, сагыш-сеткил талазы-биле дээш янзы-бүрү эки чаңчылдары сайзырап, илереп келген. Байырлыг кежээге ниитизи-биле 13 студентилер отряды киришкен. Студентилерниң улуг өг-бүлезинде угланыышкыннарны санап четпес, кандыызы-даа бар. Педагогиктиг отрядтарга «Авокадо», «Найырал», «Ужудуушкун», «Аврора» хамааржыр. Янзы-бүрү хевирниң ачы-дузазын чедирер “Атланта”, Путинниң «Феникс» болгаш «Дельфин», экологтуг “Дамдыжыгаш”, тудуг отрядтары «Ирбис», «Монолит», дилеп тывар камгалакчы отряд “Дуза”, “Альфа”, университеттиң ниити студентилер отрядтарының штавы хамааржыр.
Ук байырлалга кызыгаарланып, Тываның регионалдыг салбыры тергииннерге болгаш оларның ада-иелеринге өөрүп четтириишкин бижиктерин тывыскан. Ол ышкаш университеттиң чогаадыкчы коллективтери, “Саяннар” ансамблиниң солистери болгаш студентилер отрядтарының төлээлери байырлыг кежээни каастап турган.
Бо чылын “Школаларның капиталдыг септелгези” деп төлевилелге база киришкен. Студентилер отрядтарының төлээзи болурга, эки талалары хөй. Олар боттарын бүгү талалыг сайзырадып, өскелерге кандыг-даа үеде дузаны кадар аргалыг болур болгаш оларга ажылга тургустунуп алыры база чиик болур. Чүге дизе олар студент тургаш-ла удуртукчу, идепкейжи, эң-не тергиин кижилер-биле деңнежип турар кылдыр өзүп келген болурлар. Республиканың “Бис кады бис” төлевилелинде болгаш ачы-дуза чедирер акцияларында студотрядтар доктаамал киржип турар. Россияның бүгү-ле университеттериниң аразынга болуп эрткен спартакиадазынга киришкеш, тиилекчи болганы онзагай. Студентилер отрядтарының төлээлери – Тыва чуртувустуң төлептиг келир үези.
Чыжыргана СААЯ.
Буян ООРЖАКТЫҢ тырттырган чуруктары.
