2025 чылдың апрель 17-де Таңды кожууннуң суурларынга ТР-ниң Чазааның 2024 чылда кылган ажыл-чорудулгазының отчедун чонга таныштырган. Шак ындыг отчеттуг хурал Кочетов суурнуң Оюн Болдукпан аттыг клувунга болуп эрткен.
Тыва Республиканың Чазааның төлээлери баштаан ТР-ниң аныяктар сайыды С.В. Оюн, ТР-ниң Дээди Хуралының депутады А.С. Ширижик база ТР-ниң Өөредилге яамызындан А.В. Куулар биле Саң-хөө яамызындан Ч.Р. Сат, Таңды кожуун чагырга даргазының бирги оралакчызы Т.Х. Оюн олар чонга Тываның Чазааның кылган ажыл-чорудулгазын таныштырганнар.
Хуралды Кочетов суму чагыргазының даргазы А.М. Оюн чонга ТР-ниң Чазааның төлээлерин таныштыргаш, хуралды эгелээн деп чарлаан.
ТР-ниң аныяктар сайыды С.В. Оюн Тыва Чазактың 2024 чылда кылып чоруткан ажыл-чорудулгазын, ылаңгыя бистиң кожуунувустуң дугайында таныштырды:
- Балгазын суурнуң чаа школазының тудуун доозуп, ажыглалга киирген;
- Бай-Хаак суурда база чаа школаның тудуун удавас доозар, бо өөредилге чылында школачылар өөренип эгелээр;
- Бай-Хаак суурда чаа клубту 2024 чылда эгелээн, бо чылын база ажыглалга киирер;
- Кочетов – Элегес-Аксы аразында 31 км орукту асфальтылаар.
Ол оруктуң 2024 чылда Тываның Чазаа акшаландырган, орукту бо чылын кылып эгелээр дээрге, залда олурган чон туруп келгеш, адыш часкап, аажок өөрээннер. Чоннуң өөрүвес аргазы чок. Элээн каш чылдар иштинде Чазактың чылда кылган ажыл-чорудулгазын суурга таныштырып кээрге-ле, Кочетов – Элегес-Аксы болгаш Бай-Хаак – Кочетов оруун септеп кылыр дугайында дилегни чеже-даа катап киирген турган.
Тус черниң чурттакчылары Тываның Баштыңы В.Т. Ховалыгга чоннуң орук дугайында айтырыын шиитпирлеп бергени дээш өөрүп четтиргенин илереткеннер. Кандыг-даа албан черлеринде ажылдап чоруур даргаларның кылып турар ажыл-чорудулгазын улуг дужаалдыг даргалар эвес, чүгле чон үнелеп чоруур болгай.
Чазактың 2024 чылда кылган ажыл-чорудулгазын чон видеороликтен база таныжып көрдүлер. 2024 чылда ТР-ниң Чазааның кылган ажыл-чорудулгазын солун-сеткүүлде, интернет четкизинде-даа бижээн. Кысказы-биле, Тывавыс сайзырап бар чыдар-дыр.
Шиитпирлээр айтырыглар суурда ам-даа бар, ону Тываның Чазаа-даа, кожуун чагыргазы-даа хары угда шиитпирлеп шыдавас, өске кожууннар, хоорайлар-даа бар. Ынчалза-даа суурнуң чону Бай- Хаак – Кочетов аразында оруктуң байдалын база дыңнаткан. Ол орукту кылгандан бээр 50 чыл ашкан. Ынчан оруктуң бедии бир метр ажыг турган, амгы үеде ооң сайы төнүп, кара довуракта келгенинден часкы үелерде хар эриирге, чайгы үелерде улуг суггур чаашкын соонда, суурлар аразынга машиналыг аргыжары берге болуп турар.
База бир берге айтырыг— Кочетов суурда аныяктарның хүрежир, ойнаар спорт залы чок. Аныяктарже сагыш салыр болза эки. Оларның кылыр чүвези чокта, корум-чурум үрээр, арагалааш кем-херек үүлгедир чоруктар база тыптып болур. Элегес суурда клубка кожа спорт залды кылган болгай, шак ындыг спорт залын Кочетов суурнуң клувунга улаштыр тудуп болур. Аңгы спорт зал тударга, хөй акшаландырыышкын кирер: одаар, чырык дээш оон-даа өске негелделер туруп кээр. Бо айтырыгны бо чылын эвес-даа болза, келир чылда шиитпирлеп бээр аргазын ТР-ниң Чазаандан чон дилегни киирген.
Ол ышкаш ТР-ниң Дээди Хуралының депутады А.М. Ширижиктен, кожуунувуста Чазактың төлээзи куратор С.В. Оюндан, ТР-ниң Чазаандан болгаш ТР-ниң Орук-транспорт комплекизиниң яамызындан орук айтырыын деткиир дугайында база дилегни чон киирдилер.
ТР-ниң Дээди Хуралының депутады А.М. Ширижик Кочетов суурда уруглар садының, школаның болгаш культура одааның септелгелерин 2021 чылда таптыг кылбайн, ара каапкан айтырыгга чогуур органнардан дораан айтырып, хемчег алырын чонга дыңнатты.
2025 чылдың планынче чоннуң үзел-бодалын дыңнааш, кииргеннер.
ТР-ниң Чазааның 2024 чылда кылган ажыл-чорудулгазын түңнээн. Чонувус «эки» деп үнелелди бергеннер.
Сергей ОЮН, Таңды кожууннуң Төлээлекчилер хуралының депутады.
Чурукту интернет четкизинден хоолгалаан.
«Шын» №15 2025 чылдың апрель 24
