Орус географтыг ниитилел “Дөрт дээр” деп тырттырар бөлүк-биле кады Тыва дугайында бир дугаар 360 фильмни тырттырган. Амгы үеде ук бөлүк “Дөрт дээрниң” чиңгине директору Дмитрий Степанюктуң удуртулгазы-биле VR-порталдың тырттырган соонда кылыр ажылдарын дооскан. Көрүкчүлерге баштайгы көрүлдезин көргүзеринге белен.
Орус географтыг ниитилелдиң VR-технологиялар дузазы-биле тырттырган бөлүк видеороликтери бажыңдан үнмейн, делегейниң кайы-даа булуңундан Тываны көөр арганы тургускан. Виртуалдыг аян-чорукчу кандыг-бир объектини тода кылдыр көөр дээш, чоокшуладып, ооң бойдузун, каас-чараш черлерин, тоолчургу чугааларын бүрүнү-биле сиңнигип кире бээр технологиялар дузазы-биле бодунга эптиг ракурстан өөренип көөр аргалыг.
«Прогулки по Туве», «Тува. Ворота в Шамбалу» деп бичии-бичии сериялыг кинолар бүдүн республиканы эң-не ыраккы кожууннарындан эгелээш, бүрүнү-биле тырттырган түңнели болган. Көрүкчүлер Азия төвүн, Россияда Будданың эң-не улуг тураскаалын, хуулгаазын Сүт-Хөлдү, удуп чыдар вулканнарны болгаш республиканың оон-даа өске чурумалдыг черлерин көөрлер.
VR-төлевилел республиканың бүгү географиязын хаара тудуп, кожуун бүрүзүнүң онзагайларын ажыдып турар. Тырттырар бөлүк оон ыңай чедери берге Мөңгүн-Тайга, Бай-Тайга деп дагларга, Тожунуң хөлүнге база чедип, Тываның чүзүн-баазын өңнерин кино таварыштыр бүрүнү-биле көргүзер дээш, тус черниң чурттакчылары-биле чугаалашкан.
Тываже виртуалдыг аян-чорукче Улусчу ажыл-агыйлар чедиишкиннериниң делгелгезинде Тываның стендизинден база чоруп болур. Күзелдиг кижи бүрүзү июль 8-ке чедир VR карак-шилин кедип алгаш, дүргени-биле Тывага чеде бергеш, ооң онзагай бойдузун болгаш культура тураскаалдарын шинчилеп көрүп болур.
Фильмни Москвада ТР-ниң Бүрүн эргелиг төлээ чериниң сайтызындан https://vk.cc/cy3rMk база «Мира географии» деп порталдан https://vk.cc/cy3rMY көрүп болур.
Чыжыргана СААЯ белеткээн.
Чуруктарны интернет четкизинден алган.
“Шын” №49 2024 чылдың июль 3
