Тываның күрүне университединиң филология факультеди чыл санында дээди эртемниг тыва, орус, даштыкы, оларның иштинде англи, немец / француз / кыдат, моол дыл башкыларын белеткеп доостуруп турар.
Чаа школа болгаш ортумак өөредилге черлерин доосканнарны 2024-2025 өөредилге чылында дараазында профильдерже кирип алырын сүмелеп турар.
Бакалавриат:
1. «Төрээн дыл, чогаал» болгаш «Даштыкы дыл (англи дыл)». Ортумак профессионал эртемниң диплому-биле кирерде, документилерни июль 10-га чедир дужаар. Школа дооскан аттестаттыг абитуриентилер июль 20-ге чедир дужаар. Шылгалдалары: обществознание, орус дыл, төрээн дыл болгаш чогаалга тестирование.
2. Журналистика, профили «Периодиктиг үндүрүлгелер болгаш мультимедийлиг журналистика», өөренир хуусаазы – 4 чыл, дужаар шылгалдалары: литература, орус дыл болгаш обществознание/ төөгү/ география/ даштыкы дыл (англи дыл).
/ деп демдек азы дээн утканы илередип турар. Ында айыткан эртемнерниӊ кайы-бирээзин шилип алыр.
Ортумак профессионал эртемниң диплому-биле документилерни июль 10-га чедир хүлээр, а аттестат-биле июль 25-ке чедир хүлээр.
3. «Орус дыл» болгаш «Чогаал». Өөренир хуусаазы – 5 чыл, бот-өөредилге-биле – 5 чыл 10 ай. Дужаар шылгалдалары: обществознание; орус дыл; математика/ физика/ химия / информатика болгаш ИКТ/ география/ биология/ литература/даштыкы дыл (англи дыл).
Ортумак профессионал эртемниң диплому-биле документилерни июль 10-га чедир хүлээр, а аттестат-биле июль 25-ке чедир хүлээр.
4. «Даштыкы дыл» база «Даштыкы дыл (англи дыл болгаш кыдат дыл)». Өөренир хуусаазы – 5 чыл. Дужаар шылгалдалары: Обществознание, орус дыл болгаш чогаал/ математика/ физика/ информатика болгаш ИКТ/ география/ биология/ даштыкы дыл деп эртемнерге шылгалда эртер.
5. Бот-өөредилге салбырында «Орус дыл» болгаш «Төрээн дыл, чогаал» деп чаа профиль ажыттынган. Дужаар шылгалдалары: орус дыл, основы общественных наук болгаш тыва дыл, чогаалга тест. Өөренир хуусаазы – 5 чыл 10 ай.
Ортумак профессионал эртемниң диплому-биле документилерни июль 10-га чедир хүлээр, а аттестат-биле июль 20-ге чедир хүлээр.
Филология факультединиң 2024-2025 өөредилге чылында студентилер хүлээп алыр планы-биле: «Төрээн дыл, чогаал» болгаш «Даштыкы дыл (англи дыл)», «Орус дыл» болгаш «Чогаал» база ол ышкаш «Даштыкы дыл болгаш даштыкы дыл (англи дыл болгаш кыдат дыл)» деп профиль бүрүзүнде 24 бюджет база 7 керээ езугаар өөренир олуттар бар. А Журналистикада 20 бюджет база 7 керээ езугаар олуттар бар.
Филология факультединде магистратура база бар, дараазында угланыышкыннарже документилерни июль 25-ке чедир хүлээр: «Цифровые технологии в гуманитарном образовании», «Обучение иностранному языку в поликультурной среде», «Литературное и языковое образование».
Филология факультединиң студентилери бүгү Россияның дээди өөредилге черлериниң олимпиадаларынга, делегей чергелиг эртем-практиктиг конференцияларга база аңгы-аңгы угланыышкынныг эртем бөлгүмнеринде доктаамал, чедиишкиннерлиг киржип турарлар.
Студентилерниң чедип ап турар эртем-билииниң деңнели даштыкы чурттарга стажировкалар, дыл талазы-биле үнүүшкүннүг чайгы практикалар болгаш инновацияларлыг шуулганнарга киржип турары-биле улам бедип, боттарынга чаа-чаа чүүлдерже орукту ажыдып, өскелер-биле дуржулга солушканындан онзагай төлевилелдерни чогаадып бижиирингче магадылал бооп чоруур.
Факультеттиң удуртулгазы болгаш башкылары студентилерниң ниити билиг-мергежилин быжыктырар талазы-биле тыва улусчу болгаш делегей чоннарының байырлалдарын демдеглээр, янзы-бүрү хемчеглерни эрттирер, чогаалдың болгаш чогаадыкчы чоруктуӊ мөөрейлеринге, чылдың эртер Евразияның улусчу культураларының уран көрүлдезинге калбаа-биле киржип, тиилелгелерни болгаш шаӊналдыг черлерни ап чоруур.
Күш-ажылга болгаш кадык-сергек чорукка хандыкшылды оттурар база долгандыр хүрээлелди камгалаарынга кижизидер хемчеглер үргүлчү чоруттунуп турар. Оон аӊгыда Тываның улустуң чогаалчызы, хоочун башкы Мария Күжүгеттиң удуртулгазы-биле чедиишкинниг ажылдап турар Литературлуг музей, ооң иштинде «Сорунза» деп чечен чогаал бөлгүмү хөй-хөй аныяк шүлүкчүлерни, чогаалчыларны белеткеп, оларның билиинге болгаш культурлуг сайзыралынга улуг идиг бооп турар.
Филология факультеди чаа-чаа базымнарны хүнден хүнче чорудуп, студентилерниң төрээн тыва дылды камгалап арттырарынга база келир салгалдарга байлакшылдыг чедиреринге шупту аргаларны ажыглалга киирип турар.
Чаяна ЧЫКАЙ.
Чуруктарны филология факультединиң архивинден алган.
