Октябрь 4-5 хүннеринде Улан-Батор хоорайга хоочун мөгелер аразынга 3 аңгы назы-хар аайы-биле бөлүкке национал хүреш маргылдаазы болуп эрткен. Аңаа бистиң республикадан Арзылаң мөге Чимит Куулар 55 хардан өрү назылыг, кожуун начыны Орлан Монгуш 50-54 назы харлыг мөгелер аразынга чедиишкинниг хүрешкеннер.
Арзылаң мөге Чимит Куулар бирги салыгда эгин содаандан туткаш, шелер чараш аргазы-биле көрүкчүлерни кайгаткан. Ийи дугаар салыгда онаанга аштырганы хомуданчыг болган. Кожуун Начыны Орлан Монгуш Моолдуң Чаан мөгези, Моолдуң Начын мөгези, аймак Арзылаңнары дээш дөрт кончуг шыырак мөгени октааш, шыырак 4 мөге санынче киир тудуп, 3-кү черниң хүлер шаңналының эдилекчизи болганы улуг чедиишкин. Бо хоочун мөгевистиң Улан-Батор хоорайга бир дугаар күжүн шенеп, чедиишкинниг хүрешкени тыва мөгелерге улуг өөредиг болган.
Алексей ЧАМБАЛ-ООЛ, спорттуң хоочуну.
Чуруктарны интернеттен хоолгалаан.
«Шын» №39 2025 чылдың октябрь 9
