Кызыл — Улан-Батор: аян-чорук кылыры эптиг апарган. Июнь 18-тен эгелеп Кызылдан Моолдуң найысылалы Улан-Баторже дорт рейс-биле ужуп эгелээр дээрзин Тываның Баштыңы Владислав Ховалыг бодунуң блогунга дыңнаткан.
Баштайгы санаашкыннар-биле алырга, чаңгыс талаже билеттиң эң улуг өртээ 20 муң рубль болур. Ынчап кээрге, авиакомпания карылгалыг ажылдаар – бир ужудуушкунга 1,3 сая рубль хире. Тываның Чазаа компанияның чидирген орулгазын бюджеттен субсидия-биле эгидип бээрин дугуржуп алган. Республиканың Баштыңы Владислав Ховалыг Кызыл– Улан-Батор – Кызыл рейсти субсидиялаарынга 14,4 сая рубльди аңгылаарын дааскан. Тывага өске чурттар аразынга рейстерни эгелеп, оларның доктаамал чоруун хандырары чугула деп саналдыг. Регионнуң удуртукчузунуң демдеглеп турары-биле, ук эгелээшкинни Россияның Чазаа болгаш чурттуң Президентизи Владимир Путин боду деткээн.
“Бо төлевилелди чуртталгаже боттандырар дээш чогуур нарын инфраструктураны туткан — ужудуп-хондурар шөлдү чаартырындан эгелээш, аңгы кызыгаар чурумун сагыыр терминалды тургузарынга чедир. Чурттуң Президентизиниң база Россияның Чазааның деткимчези-биле ону чедип алган бис. Каш улай ужудуушкуннуң ачызында өске чурттар-биле авиарейстер-биле аргыжар арга-дуржулга алыр бис. Ол ышкаш аэропорттуң оон-даа бурунгаар хөгжүлдезиниң барымдаазы” – деп, Тываның Баштыңы демдеглээн.
Дорт авиарейс республиканың чурттакчыларынга болгаш аалчыларынга чүнү бээрил? Бир дугаарында, үезин камнап алыр. 24 шак дургузунда орукка машина-биле азы Красноярск, Новосибирск таварыштыр ушпас. Ийи дугаарында, эптиг база. Ооң мурнунда самолёт-биле өске хоорайлардан Улан-Баторже ужарда 8 азы 12 шак херек турган болза, дорт рейс-биле чүгле 2 шак чартык болганда, Моолдуң найысылалынга чеде бээр. Үш дугаар барымдаа, ийи күрүнелер аразынга туризм ам-даа хөгжүүр. Тывага келген аян-чорукчулар улаштыр Моолче аъттаныптар азы ук чуртта туристерге Тываның найысылалынче дорт ужар арга тыптып келген. Ниитизи-биле дыштанып турар-даа кижилерге азы ажыл-херээниң аайы-биле аргыжар чонга дорт авиарейс эптиг.
Кызыл — Улан-Батор аразынга авиарейс август 31-ге чедир ужары көрдүнген. Ол үе дургузунда ийи күрүнениң чурттакчыларынга кайы хире чугулазын болгаш негелделиин шинчилеп көөр.
“Бо авиарейсти ужудары биске чугула херек. Пассажирлерниң сонуургалы болгаш чонга кайы хире негелделиг деп чүүлдү билип алыр бис. Түңнелинде келир үеде ооң экономиктиг үнези тодараттынар. Бир эвес пассажирлер хөй болур болза, улуг самолеттарның ужудулгазын өөренип көөр бис, ооң уржуунда билеттер өртээ чиигей бээр”— деп, Тываның орук-транспорт комплекизиниң сайыды Шораан Чыргал-оол чугаалаан.
Моолдуң төвүнче дорт ужудуушкуннарга АТР-42 самолетту ажыглаары планнаттынып турар. Ужудуушкуннар неделяда чаңгыс катап болур. Ниитизи-биле июнь 18-тен август 31-ге чедир 11 рейс болур. Эвээш дизе 726 пассажирни сөөртүрү көрдүнген. База ол ышкаш Тывадан пассажирлер Улан-Батордан Сеул, Токио, Пекин, Гонконг дээн ышкаш хоорайларның рейстеринче олуттарны улаштыр чагыдып алыр аргалыг болур кылдыр ужудуушкуннарны планнап турарын регионнуң Чазааның төлээлери демдеглээн.
Бистиң корр.
Чурукту интернеттен алган.
«Шын» №18 2025 чылдың май 15