Өскүс-оол дугайында тоолга үндезилээн бир дугаар тыва мюзиклди Тываның В.Көк-оол аттыг Национал хөгжүм-шии театрында тургузуп эгелей берген.
Эрткен хонуктарда Национал хөгжүм-шии театрынга К.С. Шойгу аттыг Культура фондузунуң даргазы Ирина Шойгу болгаш чаладып келген Омскунуң күрүне театрының кол режиссеру Александр Лебедев база мюзиклдиң чырык талазы-биле каасталгазын харыылаар чурукчу Мариинск театрындан Алексей Тарасов-биле ужуражылга болган.
Эрткен чылын К.С. Шойгу аттыг Культура фондузу Өскүс-оол дугайында тыва улустуң тоолдарынга үндезилээн бир дугаар тыва мюзикл тургузар грант ёзугаар мөөрейни чарлаан турганын сагындыраалы. Ооң тиилекчилери болган ужуражылгага киришкен.
Бо хүннерде ТР-ниң Культура яамызының деткимчези-биле мюзиклди сценага тургузар ажыл кидин түлүк эгелей берген. Беш композитор, үш дизайнер мюзиклдиң хөгжүм каасталгазы болгаш костюмнарын кылыр ажылды чорудуп турар.
Мюзикл тургузар талазы-биле мергежээн профессионалдар Омскунуң күрүне театрының кол режиссеру Александр Лебедев биле Мариинск театрындан чырык талазы-биле чурукчу Алексей Тарасов ТР-ниң Культура яамызының чалааны ёзугаар бо хүннерде Тывада чедип келген.
Ужуражылга үезинде мюзиклди тургузары-биле чаладып келген режиссер болгаш чырык каастакчызы боттарының дуржулгазын солчуп, чыылганнарның арга-сүмезин дыңнап, мастер-классты база эрттирген.
Тываның культура сайыды Виктор Чигжиттиң дыңнатканы-биле ужуражылганың киржикчилери төөгүлүг мюзиклдиң тургузукчу кезээн бирден бирээ чокка сайгарып чугаалашкан.
К. МОНГУШ.
«Шын» №36 2024 чылдың май 18
