Кожууннуң херээженнер чөвүлелинде олут орбас, чыдын чытпас авалар бар. Олар культура-массалыг ажылдардан аңгыда, хөй-ниити ажылдарынга, акцияларга идепкейлиг киржип турарлар. Бирги кварталда кылып чоруткан ажылдары эвээш эвес.
Январь айда кожуунга психолог, фен-шуй талазы-биле специалисти чалап, ужуражылганы эрттирген.
Тускайлаттынган шериг операциязынче чоруткан оолдарга Шагаа байырлалын уткуштур "Шагаа сөңү" деп ачы-буян акциязынга киржип, боорзактарны хөйү-биле быжыргаш, чылыг уктарны аргааш, кожуун чагыргазында штабка хүлээткеннер.
Шагаа биле Масленица байырлалдарын таварыштыр кожууннуң хоргадал черинде ажы-төлге чигир-чимистиг белектерин сөңнеп, аалдап четкеннер.
Март 8 — Бүгү делегейниң херээженнер хүнүн таварыштыр Арысканга "Ийи сылдыс" ыры мөөрейин эрттирген. Март 18-те "Крым чазы" деп акцияга база идепкейлии-биле киришкеннер.
Бо чыл кожуунда юбилейлиг чыл болуп турары-биле, бүгү-ле хемчеглер "Улуг-Хем - алдаржы, Улуг-Хем - сайзыра!" деп кыйгырыгның адаа-биле чоруп турар.
Улуг-Хемчилер төрээн кожуунунуң байырлалын арыг-силиг, каас-чараш эрттирер дээш, ооң чаагайжыдылгазынга үлүг-хуувус кадар планныг.
Бо ажылга боттарының улуг үлүүн кадарын херээженнер чөвүлели база утпаан. Шагаан-Арыг хоорайның 135, кожууннуң 100 чылында хоорайның кудумчуларын саглаң чечектер каастап турзун дээш 100 петуния чечектериниң өзүмнерин тараан.
Узун дыштанылга хонуктарында кожууннуң социал бөлүү-биле демнежип, хыналда рейдилерге киржип турарлар. Май айда улуг байырлалдар — Частың болгаш күш-ажылдың база улуг Тиилелгениң байырлалдары. Бо байырлалдар таварыштыр база эрттер хемчеглерге улуг-биче чон киржир. Ол ышкаш, Кызылдың Арат шөлүнге республиканың херээженнер Эвилелиниң кежигүннериниң көргүзери концертке белеткел чоруп турар.
Кожууннуң херээженнер чөвүлели чыглып келгеш сүмележир, ажыл кылыр аңгы өрээлдиг апарганынга өөрүп, байырлыг ажыдыышкынын кылганнар.
Улуг-Хем кожуун солунунуң медээзи-биле.
