Улуг-Хем кожуунда картофель үрезини-биле дузалаар төлевилелдиң боттанып турарының дугайында кожуун чагырыкчызының социал политика талазы-биле оралакчызы Михаил Даспак таныштырды.
Ук кожууннуң девискээринге огород ажылының хемчеглериниң баш удур бадылаттынган планы ёзугаар март айдан эгелеп белеткел ажылдары эгелей берген. Каш өг-бүледе картофель үрезини бар-чогун демдеглеп, социал дуза херек өг-бүлелерни тодарадып санаан. “Улусчу картофель” губернатор төлевилелин боттандырары-биле кожуун чагыргазы тускай хемчеглер планын бадылаар” дугайында доктаалды үндүрген. Төлевилелдиң паспортун 2023 чылдың апрель 14-те бадылаан. Ук ажылды чорударын суму чагыргаларының социал политика талазы-биле оралакчыларынга дааскан. Ол ышкаш эвээш хөреңгилиг өг-бүлелерге дуза кадарын, картофельди үе-шаанда олуртурун болгаш ооң дүжүдүнүң ажаалдазын хайгаараары-биле агитквартира кежигүннерин, Херээженнер болгаш Адалар чөвүлелдерин быжыглаан.
“Улусчу картофель” губернатор төлевилелинге кызыгаарланып, кожууннуң бюджединден 1216,0 муң рубль көрдүнген. Сумуларда үрезин алыкчыларының даңзызын тургузар ажылдарны чоруткан. Хууда сайгарлыкчы Радмир Сат, тараачын фермер ажыл-агыйлыг Владимир Тюлюш олар 1 кг картофель үрезинин 40 рубльге садар күзелин илереткен.
2852 эвээш хөреңгилиг өг-бүлелер аразындан амгы үеде 1523 өг-бүлениң бодунуң курлавырында картофель үрезини бар, а 1329-у картофель үрезинин хереглеп турар. Оларның аразында чүгле эвээш хөреңгилиг өг-бүлелер эвес, а тускай шериг операциязының киржикчилериниң өг-бүлелери база кирип турар. Эң хөй төлевилел киржикчилери Шагаан-Арыг хоорайда 463 кижи болуп турар. Хайыракан- да — 229, Арыг-Үзүүнде — 150, Торгалыгда — 124, Иштии-Хемде — 72, Арысканда — 64, Ийи-Талда — 61, Арыг-Бажында — 60, Чаатыда — 56, Эйлиг-Хемде — 50 киржикчи бар. Үрезин алыкчылары картофельди алгаш, боттарының огородтарынга тарыыр болганнар. Ук ажылды чагырга ажылдакчылары, херээженнер чөвүлелдери, агиткваритарларның идепкейжи кежигүннери болгаш сумуларда депутаттар хыналдага алыр болганнар.
“Улусчу картофель” төлевилелиниң ачызында картофель болгаш өске-даа ногаа культуразы тарыыр шөл 13,3 га улгаткан.
Улуг-Хем кожууннуң девискээринде ниитизи-биле 41 км хемчээлдиг 13 арык бар. Бо хүннерде ук арыктарны аштап-арыглаар ажылдар уламчылап турар. Ниитизи-биле 87 кудук шупту ажылдап турар. Суггарылга ажылдары чорударынга эптиг байдалды май эгезинде-ле тургускан.
“Улусчу картофель” төлевилелиниң киржикчилеринге дуза чедирери-биле Улуг-Хем кожуунда 87 трактор бар. Оларның 67-зи хууда кижилерде, а 21-и көдээ ажыл-агый барааннары бүдүрүп турар хамаатыларда.
Чыжыргана СААЯ.
"Шын" №35 2023 чылдың май 17
