Өвүрнүң Хандагайты суурда харылзаа төвү Россияның Социал фондузунуң баазазында чер-черлерде ажытканы төптериниң 13 дугаары болуп турар. Шак ол төптерге улуг назылыглар боттарының эгелээшкиннерин боттандырып, чаа чүүлдерге өөренип, аразында арга-дуржулга солчуп, деткижеринге кончуг эптиг болуп турар.
Төптүң байырлыг ажыдыышкынынга Россияның Социал фондузунуң Тывада салбырының даргазы Часкал Дараа, Өвүр кожууннуң чагырыкчызы Айдыс Куулар, кожууннуң баштыңы Анай-Хаак Лопсан-Серен, Өвүрнүң прокурору Буян-Бады Нурзат, кожууннуң хоочуннар болгаш хөй-ниити организацияларының төлээлери дээш өске-даа чалаттырган аалчылар киришкен.
«Өвүр кожуунда Улуг назылыгларның аралажыр төвү ажыттынганы-биле байыр чедирип тур бис! Шак ындыг төптерниң ажыл-чорудулгазының дуржулгазындан алгаш көөрге, улуг назылыгларның хостуг үезин эрттиреринге дыка херек болуп турар. Ол пенсия назылыгларны хаара туткан төптер ажыктыг чүүлдер шиңгээдип, чаа билиглерге өөренип алырынга болгаш чогаадыкчы талаларын улам-на сайзырадырынга кончуг таарымчалыг болуп турар” – деп, Часкал Дараа демдеглээн.
Ук кожууннуң удуртулгазы чаа ажыттынган Төп Өвүр кожууннуң бүгү сумуларының хоочуннарын болгаш хөй-ниити организацияларын каттыштырарынга, бот-боттарының аразында дуржулга солчуп аралажырынга эптиг чер болур дээрзин бүзүреткен. Ол ышкаш бо төлевилелди бүгү талалыг деткип, төпке культурлуг хемчеглерни удаа-дараа организастаарынга дуза кадарынга кезээде беленин чугаалааннар.
Байырлыг ажыдыышкынга «Соруктуглар» хоочуннарның чогаадыкчы клуву болгаш Культура бажыңының артистери чыылганнарга оюн-тоглаалыг солун концертти бараалгаткан.
Төптүң ажыл-чорудулгазын деткип, тус черниң кадык камгалалының албан черлери, культура, эрге-хоойлу ажылдакчылары дээш өске-даа албан организациялары шупту катчып, янзы-бүрү айтырыглар талазы-биле консультацияларны, лекция, беседаларны чорударынга беленин чугаалаан. Чижээ, төпке болур хемчеглерге киржип келген улуг назылыгларга кибермөлчүкчүлерге удур профилактиктиг ажыл чорударынга эптиг дээрзин кожууннуң прокурору Буян-Бады Нурзат чугаалаан.
Өвүр кожууннуң Пенсионерлер эвилели биле Хоочуннар эвилели РСФ-тиң Тывада салбырынга четтиргенин илереткеш, улуг назылыг улуска сагыш-сеткилинге таарымчалыг солун ужуражылгалар, ажыктыг хемчеглер төпке кезээде эртип турарын күзээннер.
Сагындырып каар чүүл, Тывада 18 РСФ-тиң клиент албаны ажылдап турар, оларның 13-үнде улуг назылыгларның аралажыр төптери ажыттынган. Шак ындыг төптерге 3,8 муң ажыг хемчег болгулаан, ынаар 35 муң ажыг кижини хаара туткан болуп турар.
Онза кичээнгейни ТШО киржикчилерин деткииринче угландырып турар. Шак ындыг төптерде мөңгүн волонтёрлар чажыртынар четкилерни, оңгу лааларын белеткеп, чылыг уктарны аргып, ооргага шарыыр чылыг куржагларны даарап дээш өске-даа чугула херек чүүлдерни боттарының холу-биле кылып, дайынчыларже удаа-дараа чорудуп турар.
Бистиң корр.
Россияның Социал фондузунуң Тывада салбырының медээзи.
“Шын” №37 2025 чылдың сентябрь 25
