Дүүн, май 8-те, Виктор Көк-оол аттыг Национал театрга Ада-чурттуң Улуг дайынынга Тиилелгениң 79 чылдаан оюнга тураскааткан байырлыг концерт болган.
Байырлыг концертти Тываның симфониктиг оркестриниң дайын үезиниң аялгаларының күүселдези-биле эгелээн.
ТР-ниң Баштыңы Владислав Ховалыг байырлыг хемчегни ажыдып, сөс алгаш, чыылганнарга Тиилелге хүнү-биле байырын чедирген:
«Тиилелге хүнү – хөй нациялыг Россиявыста эң-не кол байырлал. Ол күштүг сорукту, эрес-дидим болгаш маадырлыг чорукту илередип турар. Ол ышкаш тайбың чуртка амыдырап-чурттап база ажылдаар арганы биске берген дайынчыларга тураскааткан байырлал-дыр.
Ыдыктыг хүн Май 9 биске чурттаар, амыдыралды тургузар болгаш чаяар күштү берип турар. Ылаңгыя бөгүн ону дыка эки медереп билип турар бис. Ада-чурттуң Улуг дайынының айыыл-халавының, ажыг-човулаңының база миллион когарааннарның соонда, Россия база катап бодунуң тайбың болгаш хамаарышпас чоруу дээш туржуп турар. База катап бистиң чонувус маадырлыг чоруун, демин болгаш чаңгыс эвин көргүзүп тур.
Россияның Чепсектиг күштериниң чаа салгалының солдаттары болгаш офицерлери, эки турачылары ада-өгбелери ышкаш төрээн чуртунуң хосталгазы дээш, шынчы болгаш буянныг чоруу дээш база-ла эрес-дидим тулчуп турарлар. Ада-чурттуң Улуг дайынынга маадырлыг чоруктар оларга күштү берип турар.
Хүндүлүг чаңгыс-чер чурттугларым, сеткилимниң ханызындан силерге тайбың амыдыралды, быжыг кадыкшылды база бүгү ажыл-херээңерге чедиишкиннерни күзедим! Тиилелге хүнү-биле!».
Дараазында Россия Федерациязының болгаш Тыва Республиканың күрүне шаңналдарын байырлыг байдалга тыпсыр ёзулал болган.
РФ-тиң Президентизиниң Чарлыы-биле дайынчы хүлээлгезин күүседип тургаш эрес-дидим чоруу база демиселге бодун хайыралавазы дээш «Эрес-дидим чорук» медальдары-биле Кежик Өпейни, Айдыс Ховалыгны база Василий Анчини шаңнаан.
«Улуг Тиилелге хүнү-биле шуптуңарга байыр чедирип тур мен! Мээң ажыл-херээмге бедик үнелелди бергениңер дээш өөрүп четтирдим. Бо улуг шаңнал чүгле мээң эвес, тускай шериг операциязынга киржип тургаш маадырлыы-биле мөчээн эш-өөрүмнүң база шаңналы-дыр» - деп Василий Анчи чугаалаан.
ТР-ниң Баштыңының Чарлыы-биле дайынчы хүлээлгезин күүседип тургаш эрес-дидим чоруу база демиселге бодун хайыралавазы дээш «Тиилелге хүнү!» деп тураскаалдыг медальды Евгений Тенге тывыскан. «Тускай шериг операциязының киржикчизи» деп тураскаалдыг медальдар-биле Арсен Белекпен, Буян Куулар, Айдын Күжүгет, Шораан Иргит, Эдуард Монгуш, Айдын Монгуш, Буян Ондар, Ай-Хаан Соян, Мерген Седип, Май-оол Тюлюш, Анчы Ховалыг, Начын Ховалыг, Чойган- оол Ховалыг, Чингис-Хаан Чаш-оол олар шаңнаткан.
Хаяа Кууларны дайынчы хүлээлгезин күүседип тургаш эрес-дидим, маадырлыг чоруу дээш III чаданың «Буян-Бадыргы Ордени-биле» шаңнаан.
«Хүндүлүг чаңгыс чер чурттугларым, Тиилелге хүнү-биле байыр чедирип тур мен! Ада-чурттуң Улуг дайынының хоочуннары биске шуптувуска улуг үлегер. Бис тыва эки турачыларның салгалдары, өгбелеревис дээш чоргаарланып чоруур бис.
Республикавыстың чурттакчыларынга ай санында чорудуп турар тонна-тонна ачы-буянныг деткимчелериңер дээш улуу-биле четтиргенимни иелередир-дир мен. Владислав Товарищтайовичиге база Тимур Борисовичиге деткимчези дээш өөрүп четтирдим! – деп, Хая Куулар демдеглээн.
«Тиилелге хүнү-биле!» деп Улуг Тиилелгениң 79 чылдаан оюнуң тураскаалдыг медалы-биле Ада-чурттуң Улуг дайынының хоочуну Георгий Васильевич Абросимовту шаңнаан.
Шаңналдар соонда Тыва эстраданың база Кызылдың Президентиниң кадет училищезиниң шериг оркестри дайын үезиниң ырыларын бараалгаткан.
Бистиң корр.
Буяна ООРЖАКТЫҢ тырттырган чуруктары.
![](https://sun4-18.userapi.com/impg/WvCwBNY1XSq8nx27FOkVdQnXCGPPrtwAeDQSHQ/9MoP4gIOhvE.jpg?size=807x502&quality=95&sign=950dde43a68a041855f36e1a7ee81659&c_uniq_tag=SWztLSKBx5XERIWwwAWz_tWjfbOCg7DcRYm-P5JBuCk&type=album)
![](https://sun4-20.userapi.com/impg/P7KItYGjjYXbh2P-FeXcHc8ntPZfNC1piTwRoQ/wPgv_SVIY74.jpg?size=807x723&quality=95&sign=f0774b7efb79b3fda1c110a1f2746ead&c_uniq_tag=wor3fx6_BZ8idBUaA8QwbHO6hM8ir3EhLQvFRrU4UtE&type=album)
![](https://sun4-19.userapi.com/impg/ode3cEg4wjSBl182fjLrO78l1oOIZP05unWbAA/ODpWkH6h-Qg.jpg?size=807x514&quality=95&sign=08caab96d67928ddd2b3342e1c6da673&c_uniq_tag=x8Qt0yDLm3FZvYtBrvC_X-7wXmWEn821_qQaL2wynE8&type=album)
![](https://sun4-21.userapi.com/impg/2k0-B9HFkDl-YgnH7gcPa4w8j127kqHqbt-7Pw/DGFbgTQWpKo.jpg?size=789x807&quality=95&sign=e15e5c9eca7923743cba750b8ade914d&c_uniq_tag=avXAoN-R5pl8oJxrko5R_kdMbTumeL9AgFsdUvoYdTY&type=album)
![](https://sun4-19.userapi.com/impg/E6JW1PLF8m0E3B6zy3smhxJxIAG5HURyRQrrug/opaUVKhKJnk.jpg?size=807x668&quality=95&sign=d3ed732c30757e68907699866dd6b998&c_uniq_tag=dyawJtaIPvq6pB4dfIlJjHQOfvCDdVoE9BMrNzOUD-U&type=album)
![](https://sun4-19.userapi.com/impg/UsVBWqsJMonsBNX7PSMlowqMEitdLIswT_9FxA/0SYhSr13_g0.jpg?size=807x740&quality=95&sign=1a3b8f1ab674676e4ffb94a4a7304329&c_uniq_tag=cpcgPBhiKtK305rYBW8xRpIWzKJZUJn62mE0XttBDEc&type=album)
![](https://sun9-78.userapi.com/impg/4jLRozM2jX3AhUaYEP3Gs-aysmhxzOdy-ErULA/t5p20wbkE8c.jpg?size=807x696&quality=95&sign=52707d09baad55e7e3768484dffb8852&c_uniq_tag=__yKJtm45IKuFD2iudOoJ8QEJJEe8YL5P10oxI4goxM&type=album)
![](https://sun4-20.userapi.com/impg/mYvuvq_YbDo3JmhtNXj2S7SgHmtayJiAG50Cdg/tqr-bCZ6z8E.jpg?size=807x587&quality=95&sign=4ee9b2c17b8f7c5d021cba49fddf3cc3&c_uniq_tag=dMdpcW6pH36uPCXDox1e7VP0cFQ1hCmvj_smsZjrsX0&type=album)
![](https://sun9-9.userapi.com/impg/U3Tv2bY0SPIAXZtDzZBMdrQkMnVwo9UPML1iiA/ueJ0XYvWqAM.jpg?size=807x625&quality=95&sign=f47b1769136857a611d2e5cf4baeee7a&c_uniq_tag=RJxSkMymMhTZCrpGNJwV-UECmci5eBuJb3euO1MFlbg&type=album)