Декабрь 18-те Тываның күрүне университеди биле Забайкальениң күрүне университеди кады ажылдажылганың Дугуржулгазынга ат салган.
Бо хүннерде Тывага «ТШО-нуң киржикчилериниң болгаш оларның өг-бүлелериниң сагыш-сеткилиниң психологтуг реабилитациязы: сарыг шажынның практиказы болгаш РФ-те сарыг шажын общиналарының дуржулгазы” деп эртем-практиктиг конференция эрткен. Ооң иштинде Забайкальениң болгаш Тываның күрүне университеттери кады ажылдажылганың Дугуржулгазынга атты салган.
Эртем-практиктиг конференцияның кол организакчылары: Тываның Чазаа, Сарыг шажын өөредии болгаш шинчилелиниң дуза чедирилгезиниң фондузу, ТывКУ, Тываның Камбы-лама эргелели.
ТывКУ-нуң ректору, философия эртемнериниң доктору, профессор Ольга Хомушку биле ЗабКУ-нуң ректору химия эртемнериниң кандидады Оксана Мартыненко база ТывКУ-нуң өөредилге талазы-биле проректору Салима Ховалыг ийи университеттиң аразынга дуржулга солчурундан аңгыда, чаа төлевилелдер болгаш өске-даа кылып чорудар ажыл планын сайгарып чугаалашкан.
К. МОНГУШ.
ТывКУ-нуң парлалга албанының чуруу.
«Шын» №97 2023 чылдың декабрь 20
