Университеттиң Сөөлгү коңга байырлалының төнчү кезээ кол корпустуң хуралдаар залынга болуп эрткен. Аңаа “Университеттиң арны” мөөрейниң бүгү факультеттерден чыглып келген тиилекчилери, деканнары, башкылары, кураторлары болгаш ада-иелери чыглып келген. Мөөрейниң тиилекчилери чүгле “4”, “5” демдектерге өөренген эвес, олар оон ыңай спортка, уран чүүлге, эртем болгаш хөй-ниити ажылдарынга база тергиидээн дээрзин, университеттиң ректору Ольга Хомушку чыылганнарга чугаалаан.
Доозукчулар улуг чоргаарал-биле сцена кырынче үнүп, хүндүлүг аалчылар – ТР-ниң өөредилге сайыдының хүлээлгезин күүседип турар Елена Хардикова, ТР-ниң Эртем талазы-биле агентилелиниң директору Алена Стороженко, “Сүбедей” спорт школазының удуртукчузу Саян Ондар, “Баштайгыларның шимчээшкини” уругларның болгаш аныяктарның российжи шимчээшкининиң удуртукчузу Эртине Куулар оларның холундан “Өөредилгеге чедиишкиннери дээш”, “Эртем ажылынга чедиишкиннери дээш”, “Спортчу ажыл-ишке чедиишкиннери дээш”, “Хөй-ниити ажылдарынга чедиишкиннери дээш” деп номинацияларга дипломнарны болгаш хөрек демдектерин алганнар.
Ол ышкаш Тываның күрүне университединде чылдың-на “Тергиин доозукчу” деп мөөрей база болуп эртип турар. Физика-математика факультединиң студентизи Айлана Дивии бодунуң байыр чедириишкинин видео таварыштыр чоруткан. Чоокку хүннерде ол бүгү-российжи АССК фестивальда киржип турар. Ол доозуп тургаш, улуг хемчеглиг спортчу хемчегге бодунуң төрээн өөредилге черин төлээлээр.
Университеттиң студентилери боттарының белеткеп алганы оюн-көргүзүглери-биле чыылганнарны өөртүп, сөөлгү коңга байырлалынга тускай белеткээн видеолары-биле байырлыг сеткил-хөөннү оттурган.
Байырлалдың эң-не сагыш-сеткилди доюлдуруптар кезээнге коңга чаяр аас-кежик физика-математика факультединиң доозукчузу Айдыс Намчак-оол болгаш 16 дугаар лицейниң бирги классчызы Каң-кыс Монгушка таварышкан.
