Ноябрь 3, 4 хүннеринде “Уран чүүлдүң дүнү” акция Россияның бүгү регионнарынга эрткилээн. Чылдың эртер бо акцияга Тыва база каттышкан.
Тываның Алдан-Маадыр аттыг Национал музейинге чарлаттынган акция-биле хөй хемчеглер тематиктиг булуң бүрүзүнге эрткилээн. Оларның бирээзи “Афганистан: үе бисти шилип алган” деп музейниң үшкү каъдында залга тускай шериг операциязының хоочуннары-биле ужуражылга болган. Ону сонуургап келген улуг-биче улус амгы үеде шериг албанныгларның хеп-сыны, тускай шериг демдектери, шевроннарының делгелгезин көрген. Ол ышкаш музейниң удуртулгазынга “Нет уз святее товарищества” (Эжишкилер найыралы дег ыдык чүве чок) деп номнуң ийиги томун байырлыг байдалга дамчыдып берген.
Чылдың болур акция хөй кижини хаара туткан. Аңаа бүдүн өг-бүлелерден эгелээш, школачылар чүгле Кызылдан эвес, кожууннардан база класс аайы-биле мөөң-мөөң келгилээн. Болган хемчегге ТШО-нуң хоочуннары Чимит Саая, Ачыты-Мерген Шожал болгаш Эртине Кара-Сал, “Ада-чурт камгалакчылары” фондунуң Тывада салбырының удуртукчузу Мерген Кызыл-оол киришкен.
Үстүнде адаанывыс номну музейниң директорунуң оралакчызы Светлана Түлүшке дамчыдып берип тура, ында ТШО-нуң 43 киржикчизиниң дугайында бижип турарын дыңнаткаш, Ада-чурт камгалакчыларының чырык адын, оларның кылган маадырлыг чоруун келир салгалдар утпас болуру чугула деп, Мерген Кызыл-оол чугаалаан.
Аңаа келген өөреникчилер ТШО хоочуннарындан сонуургаан айтырыгларын салып, шериг хепти тудуп, кедип шенеп-даа турганнар.
Медээни болгаш чуруктарны интернет четкизинден алган.
“Шын” №85 2024 чылдың ноябрь 6
