1943 чылдың февраль 2-де, Ада-чурттуң Улуг дайынының үезинде кончуг кол рольду ойнаан Кызыл Шеригниң база бир тиилелгези - Сталинград тулчуушкуну доозулган.
Сталинград – 200 хонук дургузунда эң-не коргунчуг үени чурттап эрткен. Ынчан дайзынның күчүлүг күжүн маадырлыы-биле шыдажып, тиилеп алырынга совет солдаттарның коргуш чок тура-соруу күш киирген. Ол дугайында төөгүнү утпаза чогуур. Сталинград тиилелгезиниң дугайында чугаалап тура, ооң сүлдези болу берген Павловтарның бажыңының төөгүзүнден кайы хире берге байдал турганын билип ап болур.
Ынчангаш ол коргунчуг хүннер дугайында, Сталинград тулчуушкунунуң киржикчилери - маадырларның дугайында сактып, салгалдан салгалче ону дамчыдары- тайбың үеде чурттап чоруур бистиң шуптувустуң ыдыктыг хүлээлгевис.
Бөгүн Тываның школаларынга бо темага болгаш Волгага болган тулчуушкуннуң 80 чыл оюнга тураскааткан патриотчу класс шактарын эрттирип турар. Оон аңгыда февраль айда республиканың культура болгаш өөредилге албан черлеринге тематиктиг делгелгелер, викториналар, лекцияларны организакчылар планнап турар.
