Ноябрь 14-те Тыва культура төвүнге «XXl векте Төп Азия чоннарыныӊ төөгү-культуралыг өнчүзү» деп Бүгү-российжи эртем-практиктиг конференцияны делегейниӊ өске чурттарыныӊ киржикчилери-биле эрттирген.
Ук хемчегни ТАР-ныӊ ССРЭ-ниӊ составынга каттышканындан бээр 80 чылы болгаш сураглыг эртемден культуролог Владислав Даржааныӊ 65 харынга тураскааткан.
Тываныӊ Өөредилге яамызыныӊ эртем килдизиниӊ даргазы Ольга Шаалы конференцияныӊ киржикчилеринге байыр чедирген.
Россияныӊ хөй культуралыг чоннарыныӊ өөредилге адырынга Төп Азия чоннарыныӊ этнокультурлуг арга-дуржулгазын ажыглаарыныӊ дугайында Калмыкияныӊ күрүне университединиӊ профессору Аркадий Панькин илеткээн. Ол – Академик Н.Г. Волков аттыг «Багш» төвүнүӊ удуртукчузу, Улус өөредилгезиниӊ тергиини.
XX–XXl чүс чылдарныӊ белдиринде социал-экономиктиг, ниитилел-политиктиг айтырыгларны эртемденнер 4 аӊгы секцияга чугаалажып турган. Эртемден болгаш культуролог Вячеслав Даржааныӊ чырык адын сактып, төөгүге арттырган үнелиг эртем-шинчилелдерин, чырыкче үнген номнарын бараалгаткан.
Национал школа сайзырадыр институттуӊ директору, филология эртемнериниӊ кандидады Елена Куулар «В.Даржаа – диалектолог» деп илеткелди таныштырган. Ук албан чериниӊ этнопедагогика шинчилээр лабораториязыныӊ эргелекчизи Буянмаа Тумат «Тывага дусту казып тывары (этнокультурлуг аспект)» деп илеткелин сонуургаткан.
Төп Азия чоннарыныӊ ёзу-чаӊчылдарыныӊ үнелиг билиглерин, мергежилдерин амгы үеге таарыштыр ажыглаар аргаларны, төөгү-культуралыг өнчүнү кадагалап шыгжаары, культура объектилериниӊ документизин кылып, чурагайжыдар талазы-биле чугула айтырыгларны конференцияга сайгарып көрген.
/ Тываныӊ Өөредилге яамызыныӊ медээлеринден.
“Шын” №88 2024 чылдың ноябрь 16
